बर्लिनले नतिरेको साढे ४ सय वर्ष पुरानो ऋण ’

Krishna Giri

जर्मनीको मिट्टेनवाल्ड नामक एक सानो शहरले यदि आफूले सन् १५६२ मा राजधानी बर्लिनलाई दिएको ऋण फिर्ता पाउन सकेको खण्डमा सो शहर विश्वकै सबैभन्दा धनी शहर बन्नेछ । किनभने, यो ऋणका सावाँ, ब्याज र मुद्रास्फीतिलाई जोड्दा खर्बौं यूरोबराबर हुने देखिएको छ । गतहप्ता मात्रै एक मिट्टेनवाल्डको सरकारी अभिलेखागारमा साढे ४ सय वर्ष पुरानो तमसुक फेला पारिएपछि यो कुरा उजागर भएको हो ।

रेडियो बर्लिन ब्राण्डेनबर्ग (आरबीबी)ले प्रसारण गरेको यसबारेको समाचारअनुसार मिट्टेनवाल्डले बर्लिनलाई सन् १५६२ मे २८ तारिखमा ४ सय गिल्डर ऋण दिएको थियो । तमसुकमा लेखिएअनुसार बर्लिनले यो ऋणमा वार्षिक ६ प्रतिशत ब्याजदर दिने सम्झौता गरिएको थियो । आरबीबीले अहिलेको समयमा यो ऋणको सावाँ रकम ११ हजार २ सय गिल्डर पुगेको र त्यो ११ करोड २० लाख यूरोबराबर हुने बताएको छ ।

यो तमसुक मिट्टेनवाल्ड शहरका इतिहासविद् भेरा स्मिट्ज्डले फेला पारेकी हुन् । उनका अनुसार शहरको अभिलेखागारमा सन् १९६३ मा यसलाई पहिलोपटक ‘फाइल’ गरिएको थियो । स्मिट्ज्डले फेला पार्दा यसमा लगाइएको लाहाछाप भने उप्किसकेको थियो । ‘तर, पनि यो अहिलेसम्म वैध नै छ, किनभने सन् १८९३ मा यो तमसुकको आधिकारिता परीक्षण गर्दै यसलाई कानूनी भएको ठहर गरिएको थियो,’ उनले भनिन् ।

यस्तो ऐतिहासिक तमसुक भेटेपछि शहरका उच्च अधिकारीहरु बर्लिनलाई ऋण चुक्ता गराउन सक्रिय भएका छन् । इतिहासविद् स्मिट्ज्डसहित शहरका मेयर उवे फेइफरले बर्लिन शहरका अधिकारीहरुलाई यो ऋण तिर्न ताकेता गर्दै पत्रसमेत लेखेका छन् । तर, यो प्रयत्न यसभन्दा अघि पनि निकैपटक भएको देखिन्छ । तमसुकको अभिलेखमा लेखिएअनुसार सन् १८२० देखि प्रत्येक ५० वर्षमा ऋण तिर्न ताकेता गर्दै यस्तो पत्र लेखिए पनि बर्लिन शहरले सुने÷नसुनेझैं गरेर उडाइदिने गरेको छ ।

सहज अवस्थामा त उक्त ऋण तिर्न आनाकानी गर्ने बर्लिन शहरले यूरोजोन ऋणसङ्कटका कारण बजेटको अभाव खेप्दै गरेको वर्तमान समयमा यो कर्जा तिर्ने सम्भावना पटक्कै छैन । गतमहीना मात्रै जर्मन संसद्को वित्तीय व्यवस्थापनले सार्वजनिक गरेको प्रतिवेदनमा बर्लिन शहरको कुल बजेट घाटा साढे ६ करोड यूरो पुगेको बताइएको छ ।

प्रतिक्रिया [0]