हवाईजहाजको ककपिटलाई कागजमुक्त गर्ने नयाँ जुक्ति

Aug 30, 2012

र यो पनि

जेट विमानका ककपिटभरि कागजका म्यानुअलका थुप्रो असरल्ल हुन थालेपछि श्रीलङ्कन एयरलाइन्सले तिनको ठाउँमा आईप्याड प्रयोग गर्ने नयाँ जुक्ति निकालेको छ । एयरलाइन्सले गरेको निर्णयअनुसार बुधवारदेखि एयरबस ए ३४०, ए ३३० र ए ३२० विमानका चालकहरुले कागजको म्यानुअलको सट्टा आईप्याड प्रयोग गर्नेछन् ।

विमान सञ्चालन गर्न र दिशा पत्ता लगाउन फ्लाइट म्यानुअल चालकहरुलाई नभई नहुने निर्देशिका हो । यो निर्णयपछि श्रीलङ्कन एयरलाइन्स ककपिटमा आईप्याड प्रयोग गर्ने एशियाकै पहिलो विमानसेवा बनेको छ । श्रीलङ्काको नागरिक उड्डयन प्राधिकरणले स्वीकृति दिएपछि एयरलाइन्सले विमान चालकहरुलाई कागजी म्यानुअलको ठाउँमा आईप्याडमा आधारित ‘इलेक्ट्रोनिक फ्लाइट ब्याग’ (ईएफबी) उपलब्ध गराउने निर्णय गरेको हो । एयरलाइन्सले दिएको जानकारीअनुसार आईप्याडयुक्त ईएफबीमा उडानसम्बन्धित तथ्याङ्कहरु नियमित रुपमा प्रसारण गरिनेछन् ।

यसबाट चालकहरुले झण्डै ८४ किलोग्राम तौलका कागजी फ्लाइट म्यानुअलका ठेली पल्टाउनबाट मुक्ति पाउने र औंलाको सहायताले टचस्क्रीनबाटै आफूलाई आवश्यक सबै जानकारी पाउने विश्वास गरिएको छ । त्यसैगरी आईप्याडको प्रयोगपछि विमानमा कागजको प्रयोग न्यून हुने भएकाले वातावरण संरक्षणमा योगदान पुग्ने र वार्षिक हजारौं पन्ना छापिने खर्च पनि जोगिने एयरलाइन्सको भनाइ छ । श्रीलङ्कन एयरलाइन्सले बताएअनुसार फ्लाइट म्यानुअलको छपाइमा वार्षिक २ लाख ६४ हजार ग्यालन इन्धन खर्च हुने गरेको छ ।

यसले गर्दा कार्बनडाइअक्साइड ग्यास पनि उच्च परिमाणमा उत्सर्जन भइरहेको र त्यो अब रोकिने दाबी एयरलाइन्सको छ । ‘हामीहरु फ्लाइट डेकलमा परिमार्जनको कदम उठाउने एशियाकै अग्रणी विमानसेवा भएका छौं,’ एयरलाइन्सका कार्यकारी प्रमुख कपिला चन्द्रसेनाले भने । विमानको ककपिटलाई काजगमुक्त पार्ने यो अभियान नौलो भने होइन र थुप्रै यूरोपेली र अमेरिकी विमानसेवाहरुले आफ्ना चालकहरुलाई केही अघिदेखि नै आईप्याड दिइसकेका छन् ।