आरबीआईका गभर्नरको ‘गम्भीर’ ठट्टा

Sep 5, 2012

र यो पनि

भारतको केन्द्रीय बैङ्क रिजर्भ बैङ्क अफ इण्डिया (आरबीआई)का गभर्नर दुभ्भुरी सुब्बाराओ मौद्रिक नीतिसम्बन्धी आफ्नो अनपेक्षित निर्णयका लागि प्रशिद्ध छन् । हालै पनि उनले ब्याजदर कटौतीको अपेक्षा गरिरहेकाहरूलाई निराश बनाउने खालको घोषणा गरेका थिए । देशकै सबैभन्दा ठूलो र प्रतिष्ठित बैङ्किङ जमघटका बेला सुब्बाराओले गम्भीर मुद्रामा आफूले केही घोषणा गर्न चाहेको बताए । त्यसपछि बैङ्कहरूले राख्नुपर्ने अनिवार्य सञ्चिति रकम अर्थात् सीआरआर प्रणाली हटाउने कि भन्नेबारे छलफल गर्न विशेषज्ञहरूको समिति गठन गरेको उनले बताए । त्यसपछि उनले समितिको सदस्यमा आरबीआईकै डेपुटी गभर्नर केशवचन्द्र चक्रवर्ती र स्टेट बैङ्क अफ इण्डियाका अध्यक्ष प्रतिप चौधरी रहने बताए ।

दुवैलाई एउटा कोठामा बन्द गरिने र जबसम्म उनीहरू कुनै निर्णयमा आइपुग्दैनन्, उनीहरूलाई कोठाबाट निस्कन नदिने सुब्बाराओले आफ्नो योजना खुलाउँदै भने । तर, आफू गभर्नर रहुञ्जेल उनीहरूले प्रस्तुत गरेको प्रतिवेदन स्वीकार नगर्ने पनि उनले बताए । सुब्बाराओको कुरा सुनेर उपस्थित सहभागीमध्ये धेरैको हाँसोको फोहोरा नै छुट्यो । तर, कतिपय संवाददाताहरूले भने उनले गम्भीर मुद्रामा गरेको घोषणालाई वास्तविक ठान्दै समाचारसमेत सम्प्रेषण गर्न पुगेका थिए ।

सीआरआर प्रणाली नै हट्ने भन्ने समाचार सम्प्रेषणपछि शेयरबजारमा समेत अन्योल उत्पन्न भएको थियो । तर, चाँडै नै व्यवसायीहरूले सुब्बाराओको ठट्टा बुझे र बजार प्रभावित हुन पाएन । वास्तवमा सुब्बाराओले चक्रवर्ती र चौधरीबीचको सार्वजनिक बहसलाई सङ्केत गर्दै ठट्टा गरेका थिए । चौधरीले सीआआर प्रणालीलाई हटाउनुपर्ने तर्क गर्दै आएका छन् । पछि एकजना संवाददाताले सुब्बाराओलाई ठट्टा गरेको पो हो कि भन्ने प्रश्न सोध्दा उनले मुस्कुराउँदै जवाफ दिए, ‘तपाईंलाई के जस्तो लाग्छ ?’