७ नम्बर प्रदेशका अर्थमन्त्री बोहरालाई आत्मनिर्भर प्रदेश बनाउने चिन्ता, स्रोत खोज्दै भन्सारको अनुगमन

वीरेन्द्र भट्ट

फागुन ६, धनगढी । प्रदेश नम्वर ७ का नवनियुक्त आर्थिक मामिला तथा योजनामन्त्री झपटबहादुर बोहराले पदभारको पहिलो चरणमा कैलाली भन्सारको अनुगमन गरेका छन् । शनिवार मन्त्रीमा नियुक्त भएका बोहराले आर्थिक रुपमा प्रदेशलाई सम्पन्न बनाउन कैलाली भन्सारलाई एशियकै प्रमुख भन्सार नाकाको रुपमा स्तरोन्नती गरिने बताए । ७ नम्वर प्रदेशमा उत्पादित वस्तुलाई भारतसहित तेस्रो मुलुकसम्म निर्यात र आवश्यक वस्तु आयात गर्न योग्य बनाउन सकिने भन्दै उनले भन्सारमा कार्यरत कर्मचारीहरुले आवश्यकता महशुस गरी आवश्यक योजना बनाउन आग्रह गरे । ‘ठूलो परिमाणमा पेट्रोलिय पदार्थ आयात भइरहेको अवस्थामा त्यसलाई विस्थापित गर्ने एकमात्र उपाय जलविद्युतको विकास हो, यो प्रदेश नेपालकै जलस्रोतको हिसाबले पहिलो नम्वर भएकाले जलविद्युत विकासको विकल्प छैन,’ उनले भने । आर्थिक वर्ष २०७३/७४ मा ७ नम्वर प्रदेशबाट वार्षिक ८ अर्व ३६ करोड रुपैयाँ राजस्व संकलन हुने गरेको बताउँदै मन्त्री बोहराले तलव भत्तामा मात्रै वार्षिक ३६ अर्व र पूँजीगततर्फ १५ अर्व रुपैयाँ खर्च हुने गरेको आफूले पाएको बताए । राजस्व संकलन १६ दशमलव ५१ प्रतिशत अर्थात ८ अर्व ६६ करोड मात्रै भएकाले ५१ अर्वको खर्च थेग्न र प्रदेशलाई आत्मनिर्भर बनाउन थप ४२ अर्व राजस्व संकलन हुने वातावरण बनाउन आवश्यक रहेको उनले बताए । ‘अव खर्च घट्ने भन्दा बढ्ने भएकाले हामीले वार्षिक ६०–६५ अर्वको हाराहारीमा राजस्व संकलन गर्नुपर्छ,’ बोहराले भने । नेपालका प्रमुख १० ओटा भन्सार कार्यालयमध्ये १० औं नम्बरमा रहेको यहाँको भन्सार नाकाबाट हुने आयात–निर्यात पनि १० औं नम्बरमै रहेको भन्सार कार्यालय कैलालीले बताएको छ । माघ मसान्तसम्म एकसय दुई प्रतिशत राजस्व संकलन गरेको भन्सार कार्यालयले खाद्यन्नसहित १० ओटा वस्तुको आयात गर्दै आएको बताएको छ । यस वर्ष भन्सारसम्बन्धी ५८ ओटा मुद्दामध्ये दुई ओटा मुद्दा फच्र्यौटबाट ८५ लाख रुपैयाँ राजस्व संकलन भएको भन्सारले बताएको छ । सेवाग्राहीलाई सहज रुपमा सेवा प्रवाह गर्न रात्रीकालीन सेवाको समेत आवश्यकता महशुस गरेका मन्त्री बोहराले यसको औचित्यलाई पुष्टि हुने गरी योजना बनाउन भन्सार कर्मचारीहरुलाई निर्देशनसमेत दिएका छन् । भन्सार कर्मचारीको सक्रियता नबढेसम्म प्रदेशले आर्थिक लक्ष्य भेट्टाउन नसक्ने बताउँदै उनले व्यवसायलाई लाभ हुने गरी काम गर्न सचेत गराए । कैलाली भन्सारको चालू आर्थिक वर्षको भन्सार असुली लक्ष्य ३ अर्व रुपैयाँ रहेको कार्यालयले बताएको छ ।

प्रतिक्रिया [0]

पुरा नाम: *

इमेल: *

प्रतिकृया: *
पठाउनुहोस