न्यायपालिकामा आँच आउने कुनैपनि गतिविधि सह्य हुँदैनः राष्ट्रपति भण्डारी

विकास भट्टराई

चैत ९, नेपालगञ्ज । राष्ट्रपति विद्यादेवी भण्डारीले स्वतन्त्र न्यायपालिकामा आँच आउने कुनै पनि गतिविधि सह्य नहुने बताएकी छिन् । नेपाल बार एशोसिएशनको नेपालगञ्जमा शुरु भएको १४ औँ राष्ट्रिय सम्मेलनको उद्घाटन गर्दै राष्टपति भण्डारीले सो कुरा बताएकी हुन् ।

आर्थिक समृद्धिका लागि सबै नेपाली अग्रसर हुन आवश्यक रहेको बताउँदै उनले आगामी भदौदेखि लागू हुने संहिताको कार्यान्वयनका लागि कानून व्यवसायीहरु थप जिम्मेवार हुनुपर्नेमा जोड दिइन् ।

संविधान सभाका पूर्वसभामुख सुवासचन्द्र नेम्वाङले सङ्घीयता कार्यान्वयनका लागि उल्लेख्य कानून बनाउन अझै बाँकी रहेको बताउँदै त्यसको मस्यौदा अझैसम्म नबनेकोमा चिन्ता व्यक्त गरे । साथै उनले युरोपियन युनियन (ईयू)ले हालै सार्वजनिक गरेको निर्वाचन पर्यवेक्षण प्रतिवेदनको वक्तव्यलाई अस्वीकार गरेको समेत बताएका छन् ।

नेपाल बार एशोसिएशनका अध्यक्ष शेरबहादुर केसीले सङ्घीयतामा आर्थिक समस्या उल्लेख्य रहेको बताउँदै त्यसलाई समाधान गर्नका लागि सात ओटै प्रदेशले होसियारी पूर्वक कार्य गर्नुपर्ने बताए ।

५ नम्बर प्रदेशका मुख्यमन्त्री शंकर पोखरेलले सङ्घीयता कार्यान्वयनमा धेरै चुनौती रहेको बताउँदै सबै पक्ष यसमा गम्भीर हुनुपर्नेमा जोड दिए ।

वरिष्ठ अधिवक्ता दमननाथ ढुङ्गानाले हाल प्रतिपक्षको भूमिका गौण रहेकाले सत्तापक्षले संविधानको दायरा उल्टाउन सक्नेमा ध्यान दिनु पनि आवश्यक रहेको बताए ।

३ दिनसम्म चल्ने सम्मेलन आइतवार घोषणापत्र जारी गरी समापन हुनेछ ।

प्रतिक्रिया [0]