दानी जुकरवर्ग

Dec 20, 2012

र यो पनि

सञ्चारलाई नयाँ ढङ्गले परिभाषित गर्ने लोकप्रिय सामाजिक सञ्जाल साइट फेसबूकका संस्थापक मार्क जुकरवर्ग एक सफल उद्यमीमात्र नभई कोमल हृदयका दानी व्यक्तिका रुपमा पनि उदाएका छन् । उनले सामाजिक कार्यका लागि ५० करोड डलरको चन्दा दिएका छन् । फेसबूक इङ्कका अध्यक्ष तथा कार्यकारी प्रमुख रहेका उनले आफ्नो स्वामित्वका कम्पनीका ५० करोड डलरबराबरको शेयर क्यालिफोर्नियास्थित सिलिकन भ्याली कम्युनिटी फाउण्डेशन नामक एक गैरनाफामूलक संस्थालाई प्रदान गरेका हुन् । आफ्नो फेसबूक वालमा मङ्गलवार एक घोषणा गर्दै जुकरवर्गले उनी र उनकी पत्नी प्रिसिल्ला चानले फाउण्डेशनलाई पहिले गरेको वाचाअनुरुप सहयोग गरेको बताएका छन् ।

उनले अमेरिकी अर्बपतिद्वय वारेन बफेट र बिल गेट्सले सामाजिक र मानवीय कार्यका लागि धनाढ्यहरुलाई संलग्न गराउँदै शुरु गरेको ‘गिभिङ प्लेड्ज’ कार्यक्रमअन्तर्गत सो वाचा गरेको जानकारी दिएका छन् । ‘फाउण्डेशनले शुरु गर्न लागेको नयाँ परियोजनाहरुको आधार बनाउन हामी (म र मेरी पत्नी)ले फेसबूक इङ्कका १ करोड ८० लाख कित्ता शेयर योगदान गरेका छौं,’ जुकरवर्गले आफ्नो वालमा लेखेका छन् । मङ्गलवार वालष्ट्रीट बन्द हुँदा फेसबूक इङ्कका प्रतिशेयर मूल्य २७ डलर ७१ सेण्ट कायम भएको थियो, जसअनुसार उनले संस्थालाई प्रदान गरेको शेयरको मूल्य ४९ करोड ८० लाख डलर हुन जान्छ ।

सिलिकन भ्याली कम्युनिटी फाउण्डेशनलाई दिइएको यो अहिलेसम्मकै सबैभन्दा ठूलो चन्दा हो । फाउण्डेशनले अमेरिकालगायत विश्वका थुप्रै देशमा गरीबहरुलाई सहयोग गर्नुका साथै विभिन्न सामुदायिक कार्य गर्दै आएको छ । फाउण्डेशनले आफूलाई दिइएको रकम अथवा सम्पत्ति चन्दा दिने दाताहरुको इच्छाबमोजिम नै विभिन्न क्षेत्रमा खर्च गर्ने गर्छ ।

मार्क जुकरवर्गले आफ्नो सम्पत्तिबाट दिएको यो उल्लेखनीय आकारको चन्दा पहिलो भने होइन । सन् २०१० मा पनि उनले न्यूजर्सी राज्यको न्यूयोर्क शहरमा सार्वजनिक शिक्षा प्रणालीलाई सुदृढ बनाउन फेसबूक इङ्कमा रहेको आफ्नो १० करोड डलरबराबरको शेयर सहयोगस्वरुप दिएका थिए । पछिल्लो चन्दापछि जुकरवर्गले आगामी दिनमा सार्वजनिक स्वास्थ्य सेवा र शिक्षाको क्षेत्रमा थप योगदान गर्ने योजना बजाएको जानकारी दिएका छन् ।