विकल्प खोज्दै मन्त्री काभ्रे पुगे, विमानस्थल बनाउने ठाउँ १५ दिनभित्रै छनौट

टीपी भुसाल

वैशाख १८, काठमाडौं । नेपालको एकमात्र अन्तरराष्ट्रिय विमानस्थल त्रिभुवन विमानस्थलमा हवाई चाप बढेपछि आन्तरिक उडानको लागि विकल्प खोज्ने क्रममा पर्यटन तथा नागरिक उड्डयन मन्त्रालयले काभ्रे जिल्लाका विभिन्न स्थानको स्थलगत अवलोकन गरेको छ । संस्कृति पर्यटन तथा नागरिक उड्डयनमन्त्री रविन्द्र अधिकारी, सञ्चार राज्यमन्त्री गोकुल बास्कोटा तथा काभ्रेका सांसद तथा स्थानीय तहका जनप्रतिनिधिसहित नेपाल नागरिक उड्ययन प्राधिकरणको उच्चस्तरीय टोलीले काभ्रेको नागीडाँडा, ठूलीचौर र चिसापनीको स्थलगत अवलोकन गरेको हो ।स्थलगत अवलोकनपछि काभ्रेमा आयोजित अन्तरक्रियामा बोल्दै पर्यटनमन्त्री अधिकारीले आन्तरिक विमानस्थल निर्माणका लागि १५ दिनभित्रै स्थान छनौट गर्ने बताए । उनले भने, ‘अहिले चर्चामा रहेका तीनओटा स्थानमध्ये जुन स्थान उपयुक्त हुन्छ त्यो स्थान छनौट गरिन्छ, यसका लागि बुधवारसम्ममा विज्ञको टोली गठन गरिने छ ।’मन्त्री अधिकारीले काठमाडौंको हवाई ट्राफिक चाप अत्यधिक बढेको अवस्थामा आन्तरिक विमानस्थल निर्माणको लागि राजधानीको नजिकै भएकाले यी स्थान उपयुक्त हुने बताए । उनले यसअघि भएका सबै अध्ययन र पुनः थप अध्ययन गरी स्थल तथा यसको मोडल बारे निर्णयमा पुगिने बताए ।

काभ्रेका जनप्रतिनिधिसमेत रहेका सूचना तथा सञ्चार राज्यमन्त्री गोकुल बास्कोटाले काठमाडौंको हवाई चाप कम गर्न मात्र नभई काभ्रेको विकासको लागि पनि काभ्रेमा विमानस्थलको आवश्यक्ता भएको बताए । उनले विकासका लागि केही विनाश भएपनि त्यसलाई आत्मसाथ गरेर अघि बढ्न सबै पक्षलाई आग्रह समेत गरे ।प्राधिकरणले बनेपा नगरपालिकाको नागीडाँडा र धुलिखेल नगरपालिकामा पर्ने ठूलीचौरको यसअघि नै प्रारम्भिक अध्ययन गरेपनि चिसापानीको भने कुनै अध्ययन नभएको प्राधिकरणका महानिर्देशक सञ्जिव गौतमले जानकारी दिए । दूरीका हिसाबले पनि नाँगीडाडा र ठूलीचौर विमानस्थलभन्दा चिसापानी टाढा रहेको छ ।

प्रतिक्रिया [0]