स्वचालित कार ल्याउँदै टोयोटा

Jan 8, 2013

र यो पनि

अब मदिराजन्य पेय सेवन गरेपछि सवारी चलाउँदा प्रहरीले गर्ने ‘मापसे’ चेकजाँचमा परेर जरीवाना तिर्नुपर्ला भनेर डराउनुपर्ने दिन जान लागेजस्तो देखिन्छ । किनकि, जापानी कार निर्माता टोयोटा मोटर्सले बजारमा ल्याउन लागेको छ, स्वचालित कार । टोयोटा मोटर्सअन्तर्गतको लक्जरी कार उत्पादन एकाइ ‘लेक्सस’ले बनाएको यो कारको भिडियो क्लिपमा यसले आफ्नो बाटो आफै पत्ता लगाउने र दुर्घटनाबाट जोगाउने देखाइएको छ । भिडियोमा देखाइएअनुसार लेक्सस कारको फ्रण्ट ग्रील, पछाडिका पाङ्ग्रा र माथिपट्टि सेन्सरहरु जडान गरिएको छ । यसको मुख्य आकर्षण कारको माथिपट्टि रहेको एक सेन्सर देखिन्छ, जुन ३ सय ६० डिग्रीको कोणमा घुमिरहन्छ ।

यो कारमा जडान गरिएको अनबोर्ड राडार प्रणाली र सडकको अवस्था पत्ता लगाउने सेन्सरले दुर्घटना हुनुभन्दा पहिले नै जोगाउने र सवारीलाई गन्तव्यमा सुरक्षित ढङ्गले पुर्‍याउनेछ । ‘एडभान्ष्ड एक्टिभ सेफ्टी रिसर्च भेहिकल’ नाम दिइएको यो कारले सडकमा गुडिरहेका अन्य गाडीसँग पनि आफै सञ्चार सम्बन्ध स्थापित गर्न सक्ने बताइएको छ । यसबाट सडकमा गुडिरहँदा गाडीहरुबीच जानकारीको निरन्तर आदानप्रदान भइरहने हुनाले दुर्घटनाको जोखीम निकै कम हुने टोयोटाको भनाइ छ ।

यसलाई गुडाउन एक चालकको आवश्यकता भए पनि उसले अवस्थालाई बुझ्न नसके अथवा कुनै दुर्घटना हुन लागेमा सधैं सक्रिय रहने कारको कम्प्युटर प्रणालीले नियन्त्रणमा लिने जानकारी कम्पनीले दिएको छ । यसका साथै चालकसँग प्रत्यक्ष सञ्चार सम्पर्क गर्न सक्ने यो कारले सडकका ट्राफिक चिह्नहरु पनि थाहा पाउनेछ । साथै, बाटो काट्दै गरेका वा सडकमा हिँडिरहेका पैदलयात्रुको पनि पहिचान गर्न सक्ने टोयोटाले उल्लेख गरेको छ । यो कारको कम्प्युटरमा एक अत्याधुनिक ‘म्यापिङ’ प्रणाली छ, जसले नजिकै रहेका पेट्रोल पम्प, रेष्टुराँ, पसललगायत स्थानबारे जानकारी पाउन सक्छ ।

अमेरिकाको लास भेगास शहरमा मङ्गलवारदेखि शुरु हुने विश्वकै एक प्रमुख इलेक्ट्रोनिक्स प्रदर्शनी ‘कञ्जुमर इलेक्ट्रोनिक्स शो’ (सीईएस)मा टोयोटाले यो कारको पहिलो सार्वजनिक प्रदर्शन गर्नेछ ।