भिजे पनि नबिग्रिने स्मार्टफोन

Jan 9, 2013

र यो पनि

पानी परेको समयमा कतै गइरहँदा मोबाइलको घण्टी बजेको समयमा अथवा आकस्मिक रुपले फोन गर्नुपरेमा आफ्नो स्मार्टफोन निकाल्नुपर्दाको असहज अवस्थाले पक्कै पनि तपाईंलाई सताएको हुनुपर्छ । रहर अथवा बाध्यता जेसुकैले गर्दा भए पनि निकै महँगो मूल्य तिरेर किनेको स्मार्टफोन पानीमा भिजेर बिग्रने चिन्ता तपाईंलाई हुनु स्वभाविक पनि हो । तर, अब यस्तो चिन्ता गर्नुपर्ने दिन समाप्त हुन लागेको छ । प्रयोगकर्ताहरुको समस्या र गुनासोलाई ध्यानमा राख्दै जापानी स्मार्टफोन निर्माता सोनी मोबाइलले विक्री शुरु गर्न लागेको छ पानीमा भिजे पनि नबिग्रने एक ‘वाटरप्रुफ’ स्मार्टफोन । ‘स्नानमैत्री (बाथ–फ्रेण्ड्ली) स्मार्टफोन’ उपनाम दिइएको यो मोबाइल नुहाइरहँदा अथवा पौडी खेलिरहँदा पनि पानीभित्र ढुक्कसँग चलाउन सकिन्छ ।

सोनीको लोकप्रिय ‘एक्सपेरिया’ शृङ्खलाको पछिल्लो उत्पादनका रुपमा ल्याइएको ‘एक्सपेरिया जेड’ लाई ३० मिनेटसम्म पानीभित्र डुबाएर राख्दा पनि कुनै खराबी आउँदैन । मङ्गलवारदेखि अमेरिकाको लास भेगस शहरमा शुरु भएको ‘कञ्जुमर इलेक्ट्रोनिक्स सो–२०१३’ मा प्रदर्शित यो स्मार्टफोनले धेरैको ध्यान तान्न सफल भएको छ । अत्याधुनिक प्रविधियुक्त हाई डेफिनेशन डिस्प्लेयुक्त यो स्मार्टफोनमा उच्च रिजोलुशनका ‘एचडी’ सिनेमा र भिडियो हेर्न सकिन्छ । ‘यदि नुहाउँदै गर्दा एचडी सिनेमा हेर्न चाहनुहुन्छ भने यो उपकरण तपाईंकै लागि हो,’ सीईएसमा उपस्थित सोनी मोबाइलका अधिकारी स्टिभ वाल्करले भने । त्यसैगरी धेरै समयसम्म चलाएर मैलोजस्तो देखिएमा एक्सपेरिया जेडलाई धाराको पानीबाटै धोएर सफा बनाउन सकिने पनि उनले बताए । वाल्करका अनुसार विश्वभर १० मध्ये एक जनाले आफ्ना फोन शौचालयलगायत पानी भएका ठाउँमा खसाल्ने गरेका छन् । यतिमात्र नभई यो स्मार्टफोनको ‘इयरफोन’ (अथवा हेडसेट) पनि पानीले भिजेमा नबिग्रने गरी बनाइएको उनले बताए ।

एक्सपेरिया जेडको हार्डवेयर ‘फिचर’

यो स्मार्टफोनमा १०८० × १९२० पिक्सेल क्षमताको ५ इञ्चको एचडी स्क्रीन राखिएको छ, जसमा भिडियो प्लेब्याकका लागि सोनीको ब्राभिया टेलिभिजनकै प्रविधि सापटी लिइएको छ । यसमा प्रयोग गरिएको निकै शक्तिशाली ‘क्वालकम स्न्यापड्रागन क्वाडकोर एसफोर’ सीपीयूले अहिलेसम्मका सबैजसो कम्युटिङ कार्यहरु गर्न सक्छ । त्यसैगरी यसको इण्टरनल मेमोरी क्षमता २ गिगाबाइट र १६ जीबीको स्टोरेज रहेको छ ।

त्यस्तै, १३ मेगापिक्सलको यसको क्यामराले ‘हाई डाइनामिक रेञ्ज’ (एचडीआर) भिडियो खिच्न सक्छ । सोनीले विकास गरेको एक्समोर आरएस सेन्सर प्रविधिले गर्दा प्रकाशको मात्रालाई पहिचान गर्दै त्यसअनुसार उत्कृष्ट एचडीआर तस्वीर अथवा भिडियो खिच्न सक्छ । यसका साथै गूगलको एण्ड्रोइड ४.१ अपरेटिङ सिष्टमयुक्त यो स्मार्टफोनमा इण्टरनेट कनेक्टिभिटीका लागि वाइफाईलगायत फोरजी एलटीईको सुविधा दिइएको छ ।