कार्यालयमा हुने ‘गसिपिङ’ फाइदाजनक

Feb 4, 2013

र यो पनि

सामान्यतया कार्यालयहरुमा कर्मचारीबीच हुने अरु सहकर्मीबारेका टिप्पणी र कुरा काट्ने काम (गसिपिङ)लाई नचाहिँदो र समयको बर्बादीका रुपमा लिइन्छ । त्यसरी अरुको कुरा काट्दै हिँड्नेहरुलाई खराब व्यक्तिका रुपमा चित्रित गरिँदै त्यसले कार्यालयको वातावरण बिगार्नेसमेत आमधारणा पाइन्छ । तर, नेदरल्याण्ड्सका अनुसन्धानकर्ताहरुको एक समूहले हालै गरेको अध्ययनले भने त्यसरी गरिने कुराकानीले कार्यालयको सञ्चालनमा थप प्रभावकारिता आउने र कर्मचारीको उत्पादकत्वमा समेत वृद्धि हुने दाबी गरेको छ ।

आमष्टर्डाम विश्वविद्यालयका अनुसन्धानकर्ताहरुले गरेको उक्त अध्ययनअनुसार राम्रो प्रदर्शन गर्न नसकिरहेका कर्मचारीबारेका कुराकानी कार्यालयमा फैलिँदा उनीहरुको कार्यक्षमता बढेको पाइएको थियो । जर्नल अफ एप्लाइड सोसियल साइकोलोजीमा प्रकाशित यसबारेको एक रिपोर्टमा कार्यक्षमता राम्रो नभएकाहरुबारे सहकर्मीहरुले गर्ने टीकाटीप्पणीले उनीहरुलाई आफ्नो काम सुधार्न दबाब दिने बताइएको छ । ‘यो अध्ययनको नतीजाले प्रायःजसो नकारात्मक रुपमा लिइने गसिपिङ खराबमात्रै नहुने देखाएको छ,’ अनुसन्धानकर्ता टोलीलाई नेतृत्व गरेकी प्राध्यापक बियान्का बियरस्माले भनिन् । गसिपले मानिसहरुलाई विभिन्न जानकारी सङ्कलन, तिनको पुष्ट्याइँ र एकआपसबीचमा आनन्द लिन मद्दत गर्ने उनको भनाइ थियो । अध्ययनमा ९० प्रतिशतभन्दा बढी कर्मचारीले आफ्नो दैनिक संवादमा कुनै न कुनै प्रकारका गसिपलाई समावेश गर्ने पाइएको थियो ।

अध्ययनअनुसार गसिप हजारौं वर्षको अवधिमा भएको मानव विकासक्रमको एक उत्पादन हो । यसरी एकआपसमा हुने कुराकानी सामाजिक मान्यता पाएकाले नै मानिसहरुलाई जीवन निर्वाहका आधारभूत स्रोतहरु खोज्न सहयोग पुगेको ऐतिहासिक तथ्यलाई पनि अध्ययनले औंल्याएको छ ।