बालबालिकालाई बर्कशायरको सफलताबारे सिकाउने पुस्तक

May 14, 2013

र यो पनि

‘लगानी सम्राट’को उपाधि पाएका वारेन बफेटको बर्कशायर हाथवे विश्वको सबैभन्दा सफल व्यापारिक समूह मानिन्छ, जसले दर्जनौं सफल व्यापारमा लगानी गरिरहेको छ । यो अनुकरणीय सफलता र उपलब्धिबारे सयौंका सङ्ख्यामा पुस्तक र सामग्री लेखिसकिएका छन् । तर, अहिले भने स्कूलमा भर्खर भर्ना भएका बालबालिकालाई लक्षित गर्दै लेखिएको एक पुस्तक बजारमा आएको छ । पुस्तकका लेखकहरुका अनुसार यसले साना बालबालिकालाई बर्कशायर हाथवेको सफलताबारे ज्ञान दिँदै उनीहरुलाई उद्यमशील बन्न प्रेरणा प्रदान गर्नेछ ।

‘माई फषर्ट बर्कशायर एबीसी’नाम दिइएको उक्त पुस्तक गतहप्ता सम्पन्न कम्पनीको वार्षिक बैठकमा सार्वजनिक गरिएको थियो । बर्कशायरको मुख्यालय रहेको शहर ओमाहाकै दुई बासिन्दा नान्सी रिप्स टम केर्रले यो पुस्तक लेखेका हुन् । रिप्स शिक्षिका हुन् भने केर्र व्यावसायिक चित्रकार । परम्परागत रुपमा गरिने प्रस्तुतिभन्दा भिन्न यो पुस्तकमा एबीसीडी शब्दलाई नयाँ ढङ्गले प्रस्तुत गरिएको छ । उदाहरणका लागि अङ्ग्रेजी शब्द ‘जी’बाट ‘जीईको’लाई बुझाइएको छ । जीईको बर्कशायरअन्तर्गतको इन्स्योरेन्स कम्पनी हो । यसलाई अझै राम्रोसँग देखाउन एक व्यक्तिले आफ्नो कारको बीमा गर्न लागेको चित्र देखाइएको छ ।

त्यसैगरी ‘डब्ल्यू’ शब्दबाट समूहको लगानी रहेको ‘वेल्स फार्गो’ बैङ्क बुझाइएको छ । यसमा पनि बैङ्कको प्रख्यात घोडागाडी लोगोको चित्रलाई आकर्षक ढङ्गले प्रस्तुत गरिएको छ । त्यस्तै, ‘क्यू’ शब्दले ‘क्वालिटी’ (गुणस्तर)लाई अर्थ्याएको छ, जसमा बर्कशायरका उपाध्यक्ष चार्ली मुन्गेरले कारखानामा उत्पादित वस्तुका प्याकेजिङलाई गुणस्तरको छाप लगाइरहेको चित्र बनाइएको छ ।

पुस्तकका धेरैजसो पानामा बर्कशायर हाथवेको स्वामित्वमा रहेका अथवा लगानी भएका प्रसिद्ध कम्पनीहरुलाई नै चित्रात्मक प्रस्तुति गरिएको छ । यतिमात्र नभई वारेन बफेटजस्तै दयालु र समाजसेवी बन्न पनि पुस्तकले बालबालिकालाई प्रेरणा दिएको छ । यसमा उल्लिखित ‘एस’ शब्दले ‘शेयरिङ’ (बाँड्ने) र ‘के’ शब्दले ‘काइण्ड’ (दयालु)लाई अर्थ्याएको छ ।