राजनीतिक नियुक्ति बदरको निर्णय कार्यान्वयन नगर्न सर्वोच्चको अन्तरिम आदेश

विकास भट्टराई

असार २८, काठमाडौं । दूरसञ्चार प्राधिकरणका अध्यक्ष दिगम्बर झालाई हटाउने सरकारी निर्णय हाल कार्यान्वयन नगर्न सर्वोच्च अदालतले सरकारलाई अन्तरिम आदेश दिएको छ । केही दिन अघि बसेको मन्त्रिपरिषद्को बैठकले अघिल्लो सरकारले गरेको राजनीतिक नियुक्ति सम्पूर्ण रुपमा बदर गर्ने निर्णय गरेको थियो । सो निर्णयपछि प्राधिकरणका अध्यक्ष झालगायत केही अन्य निकायका पदाधिकारीले सर्वोच्च अदालतमा रिट निवेदन दायर गरेका थिए । न्यायाधीश पुरुषोत्तम भण्डारीको एकल इजलासले प्राधिकरणका अध्यक्ष झा र कर्जा असुली केन्द्रका प्रमुख विष्णुबाबु मिश्रलाई हटाउने निर्णय तत्काल कार्यान्वयन नगर्न अन्तरिम आदेश दिएको हो । बिहीवारको प्रारम्भिक बहसमा रिट निवेदनको तर्फबाट बहस गर्ने कानून व्यवसायीहरुले यस्ता नियुक्तिहरु राजनीतिक प्रकृतिको नभएको दाबी गरेका थिए । बिहीवार दिइएको सो अन्तरिम आदेशलाई निरन्तरता दिने/नदिने भन्ने सम्बन्धमा आउँदो साउनको पहिलो साता सरकार र रिट निवेदक बिच सर्वोच्च अदालतमा छलफल हुने भएको छ ।

प्रतिक्रिया [0]

पुरा नाम: *

इमेल: *

प्रतिकृया: *
पठाउनुहोस