कार्यालयबाटै घरायसी काम

Krishna Giri

कर्मचारीहरुले घरमा बसेर कार्यालयको काममात्र गर्दैनन्, उनीहरुले कार्यालयमै बसीबसी घरायसी कामसमेत गर्न भ्याउने गरेको एक अध्ययनले देखाएको छ । डिजिटल सञ्चार कम्पनी क्याप्टिभेट नेटवर्कले गरेको अध्ययनअनुसार अधिकांश कर्मचारीले कार्यालय समयमा बैङ्क जाने, उपहार किन्ने, पार्लर जाने, ड्राइक्लिनिङ्मा कपडा धुन दिने र ल्याउनेलगायतका निजी काम गर्ने गरेका छन् । कम्पनीले उत्तर अमेरिकाका ४ हजार ‘ह्वाइट कलर’ कामदारबीच गरेको अध्ययनमा यस्तो पाइएको आर्थिक दैनिक बिजनेश डेली न्यूजमा प्रकाशित एक समाचारमा बताइएको छ । अध्ययनमा करीब ९३ प्रतिशतले कार्यालय समयमा आप्mनो निजी काम र घरायसी आवश्यकताका काम गर्ने गरेको पाइएको छ । उनीहरुले यस्तो कामका लागि कार्यालय समयको आधाभन्दा बढी समय बाहिर बिताउने गरेका छन् । 

त्यसैगरी अध्ययनमा संलग्न ७० प्रतिशत कर्मचारीले कार्यालयको कम्प्युटर आफ्ना व्यक्तिगत कामका लागि प्रयोग गर्ने गरेको भेटिएको छ । उनीहरुले बैङ्किङ तथा बीमा गतिविधि बुझ्न, छुट्टी मनाउने कार्यक्रम बनाउन, शपिङ्ग गर्न, नयाँ खानाको परिकारबारे जानकारी लिन, नयाँ जागीर खोज्नलगायतका काम कार्यालयको कम्प्युटरबाटै भ्याउने गरेका छन् । विगत २ वर्षमा अमेरिकामा मात्र कार्यालय समयमा आफ्ना निजी काम गर्ने कर्मचारीको सङ्ख्या ३१ प्रतिशतले वृद्धि भएको छ । त्यसैगरी सन् २०११ यता दैनिक ९ घण्टाभन्दा बढी काम गर्ने कर्मचारीहरुको सङ्ख्या ३० प्रतिशतले बढे पनि आफ्नो काम र निजी जीवनबीच तालमेल मिलाउन सफल रहेको अभिव्यक्ति दिनेको सङ्ख्यासमेत बढेको छ ।‘धेरै समयसम्म काम गर्नु मानिसका लागि सहज बन्दै गइरहेको भान हुन्छ,’क्याप्टिभेट नेटवर्कका अनुसन्धान निर्देशक स्कट मर्डेनले भने । कार्यालय समयमा पनि आफ्ना व्यक्तिगत कामहरु गर्ने प्रवृत्तिमा वृद्धि हुँदा कर्मचारीहरु बढी समयसम्म काम गर्न हौसिएको उनको भनाइ छ । 

प्रतिक्रिया [0]