साना व्यवसायका लागि मुस्कान फाइदाजनक

Jul 2, 2013

र यो पनि

सामान्यतया मानिसहरु अरुलाई आकर्षित गर्न हाँसेर वा मीठो स्वरमा बोल्ने गर्छन् । बेलायतमा हालै गरिएको एक अध्ययनले यस्तो व्यवहार व्यवसायका लागिसमेत प्रभावकारी तथा फाइदाजनक हुने पाएको छ । बार्कलेज बिजनेश बैङ्किङको लगानीमा किङ्गष्टन बिजनेश स्कूलको स्मल बिजनेश रिसर्च सेण्टर (एसबीआरसी)ले गरेको सो अध्ययनअनुसार आफ्ना ग्राहकसित फरासिलो व्यवहार गर्ने साना व्यवसायप्रति ग्राहक बढी बफादार हुन्छन् । एसबीआरसीले २ हजार ६ उपभोक्ताले खुद्रा पसलमा गरेको व्यवहार र साना तथा मझौला उद्योग (एसएमई)का १ हजार २ सय १६ निर्णयकर्ताको व्यावसायिक आचरण अध्ययन गरेर यस्तो तथ्य सार्वजनिक गरेको हो । अध्ययनमा परेका ५९ प्रतिशतभन्दा बढी उपभोक्ताले आफूलाई मुस्कुराएर मित्रवत् व्यवहार गर्ने व्यवसायीहरुप्रति आफू बढी बफादार भएको महसूस गरेको बताएका छन् ।

तर, साना व्यवसायीमध्ये ५४ प्रतिशतले मात्र ग्राहकसँग आफूले मित्रवत् व्यवहार गर्ने गरेको अभिव्यक्ति दिएका छन् । त्यस्तै, पाँचमध्ये तीन उपभोक्ताले उत्पादन खरीद गर्दा ठूला खुद्रा व्यापारी कम्पनीमा भन्दा साना पसलमा बढी मूल्य तिर्ने इच्छा व्यक्त गरेको अध्ययनमा पाइएको छ । ‘ग्राहकसँग व्यक्तिगत सम्बन्ध र अपनत्वजस्ता परम्परागत मूल्य–मान्यताहरु अपनाउने सम्बन्धमा एसएमईहरु विशिष्ट अवस्थामा रहेका हुन्छन्, यसले त्यस्ता कम्पनीहरुको प्रतिस्पर्धात्मक क्षमता वृद्धि गर्न र व्यवसायलाई टिकाउनसमेत महत्वपूर्ण योगदान गर्छ,’ किङ्गष्टन बिजनेश स्कूलका प्राध्यापक रोबर्ट ब्ल्याकबर्नले भने । त्यसैगरी, अध्ययनमा संलग्न एक तिहाइभन्दा बढी बफादार उपभोक्ताले उत्कृष्ट ग्राहक सेवा दिने व्यवसायीकहाँ आफूहरु बारम्बार जाने गरेको बताएका छन् । आफूले यसअघि कस्तो अर्डर दिएको थियो, त्यो जुन व्यवसायीले सम्झन्छ उसलाई आफूले बढी मन पराउने पनि त्यस्ता ग्राहकले बताए ।

तर, अध्ययनमा समावेश गरिएका करीब आधाजसो व्यवसायीहरुले मात्र आफूले ग्राहकको पछिल्लो अर्डरबारे अभिलेख राख्ने गरेको बताए । त्यसैगरी, अध्ययनमा सहभागी एक तिहाइभन्दा कम एसएमईहरुले मात्र आगामी १२ महीनाको विक्री बढाउने उद्देश्यले वर्तमान ग्राहकलाई टिकाउने र नयाँ ग्राहक बनाउने कुरालाई प्राथमिकतामा राख्ने गरेको उल्लेख गरे । त्यस्तै, ५० प्रतिशतले मात्र आफ्नो ग्राहकले अरु व्यक्तिलाई पनि आफ्नो व्यवसायबारे राम्रो बोलेर प्रचार गरियोस् भन्ने किसिमको रणनीति अपनाएको पाइयो ।