तीज मनाउँदै गर्दा शेयरबजारमा लागेका महिलाको सुझाव

दुर्गा तिवारी सक्रिय लगानीकर्ता अहिले तीज मनाउने प्रचलनमा एकदमै विकृति आएको छ । तीज मनाउनुपर्छ भन्दैमा १ महीना अगाडिबाट दरखाने प्रवृत्ति पनि राम्रो होइन । अझ यसमा पनि लुगा, सुन, गहना र कपडा किन्ने प्रचलन रहेको छ । हामीले हाम्रो संस्कृतिको जर्गेना गर्नुपर्छ । तर, त्यसको नाममा अनावश्यक खर्च गर्नु राम्रो होइन । म तीजमा धेरै समय र पैसा खर्च गर्नुको सट्टा त्यो समय र पैसा कुनै उत्पादनशील क्षेत्रमा लगानी गर्न आग्रह गर्छु । म शेयरबजारमा लागेकाले के भन्छु भने, ‘महिला दिदीबहिनीलाई त्यो समय र पैसा शेयरबजारमा लगानी गर्नुहोस् । राम्रो प्रतिफल दिने कम्पनीको शेयर किन्नुहोस् । त्यसबाट छोटो समयमा राम्रो आम्दानी गर्न सकिन्छ ।’ राधा पोखरेल अध्यक्ष नेपाल पूँजीबजार लगानीकर्ता सङ्घ पहिलापहिला कुशेऔंशीपछि दरखाने प्रचलन थियो । अहिले १ महीनाबाट दरखाने प्रचलन भित्रिएको छ । यो एकदमै विकृति हो । पार्टी प्यालेसमा गर्ने खर्च, लुगा र गरगहनामा गर्ने खर्च पूँजीबजारमा लगानी गर्नुहोस् । अहिलेको बदलिँदो समाजमा नारीले पनि धेरै ठूलो काम गरेका छन् र गर्न सक्छन् भनेर देखाइसकेका छन् । म के भन्छु भने, ‘दिदीबहिनीले १ तीजमा १ महीना खर्च गर्ने पूँजी बचाएर पूँजीबजारमा लगानी गर्नुहोस् । पछि आफूलाई समस्या पर्दा उपयोग गर्न सकिन्छ र छोटो समयमा नै राम्रो आम्दानी गर्न सकिन्छ ।’ सरिता विष्ट अध्यक्ष, लिञ्च स्टक मार्केट लि. तीज भनेको वर्ष दिनसम्म भेट नभएका दिदीबहिनी भेट भई दुःखसुख साटासाट गर्ने दिन हो । वास्तवमा दर खुवाउने भनेको माइतीले हो । अहिले १ महीना अगाडिबाट दरखाने विकृति आएको छ । यस्तो खालको विकृति शहरमा मात्र हो । गाउँतिर भने यस्तो प्रवृत्ति छैन । गाउँका सहकारीमा आबद्ध दिदीबहिनीहरूले कृषिसम्बन्धी जनचेतना दिएर मनाएको देख्छु । आफ्नो कमाइअनुसार खर्च गर्ने प्रचलन छ । यो एकदमै राम्रो लाग्छ । तीजमा खर्च गर्नुहोस् तर चाहिएको बढी तडकभडक गरे र अनावश्यक खर्च गरे होइन । यसबाट केही रकम बचाएर उत्पादनशील क्षेत्रमा लगानी गर्नुहोस् । म शेयरबजारमा लागेकाले हजुरहरूले १ महीना अगाडिबाट तीजमा खर्च गर्ने रकम पूँजीबजारमा लगानी गर्न आग्रह गर्छु ।