अन्तरराष्ट्रिय बीमाविज्ञ तथा व्यवसायीहरू काठमाडौंमा : बीमासम्बन्धी अन्तरराष्ट्रिय सम्मेलन आज

मिलन विश्वकर्मा

• मुख्य एजेण्डा ‘विपद् जोखीम व्यवस्थापन’
• प्रविधिमय बीमा बजारसम्बन्धी पनि छलफल हुने

काठमाडौं । बीमासम्बन्धी अन्तरराष्ट्रिय सम्मेलन आज (मङ्गलवार) देखि काठमाडौंमा शुरू हुँदै छ । विकासशील राष्ट्रका बीमक र पुनर्बीमकको सङ्गठन (एआईआरडीसी)को २१औं अन्तरराष्ट्रिय सम्मेलन नेपालमा दोस्रोपटक हुन लागेको बीमा समितिले बताएको छ । सम्मेलनको अर्थमन्त्री डा. युवराज खतिवडाले उद्घाटन गर्ने कार्यक्रम छ । नेपालमा यसअघि सन् २००० मा यस्तो सम्मेलन भएको थियो । १८ वर्षपछि नेपालले पुनः एआईआरडीसीको सम्मेलनलाई नेतृत्व गर्ने अवसर पाएको छ । सम्मेलन बुधवारसम्म चल्ने छ । एआईआरडीसीसहित बीमा समिति र नेपाल बीमक सङ्घको सहकार्यमा सम्मेलन आयोजना गरिएको हो । नेपालको बीमाबजारलाई समय सान्दर्भिक बनाउन सम्मेलन लाभदायी हुने अपेक्षा गरिएको छ । समितिका अनुसार सम्मेलनमा सहभागी हुन विभिन्न मुलुकका नियामक निकायका प्रतिनिधि, बीमाविज्ञ तथा व्यवसायीहरू काठमाडौं आइपुगेका छन् । केही देशका प्रतिनिधिहरू मङ्गलवार नै नेपाल आउने समितिले बताएको छ । समितिका अनुसार सम्मेलनमा झण्डै २० राष्ट्रका २ सयभन्दा बढी प्रतिनिधिको सहभागिता हुनेछ । त्यसबाहेक स्वदेशका करीब ३ सय जनाको सहभागिता हुने अनुमान छ । सम्मेलनमा ८ मुलुकका बीमाविज्ञहरूले विपद् जोखीम व्यवस्थापन, बीमाबजारमा प्रविधिलगायतका विषयमा कार्यपत्र प्रस्तुत गर्नेछन् । सम्मेलनमा बीमाको वर्तमान समस्या र आगामी चुनौतीबारे पनि छलफल हुनेछ । सम्मेलनमा प्रस्तुत कार्यपत्रमाथि छलफल गरेर आएको निष्कर्षको आधारमा घोषणापत्र जारी गर्ने आयोजकको भनाइ छ । बीमा समितिका अध्यक्ष चिरञ्जीवी चापागाईंले सम्मेलनमा विपद् जोखीम व्यवस्थापनसम्बन्धी विषयमा केन्द्रित रहेर छलफल गरिने बताए । उनले भने, ‘नेपालमा भूकम्प, बाढीजस्ता प्राकृतिक विपद्ले ठूलो मात्रामा जनधनको क्षति हुँदै आएको छ । त्यसकारण यस विषयलाई मुख्य एजेण्डाको रूपमा प्रस्ताव गरिएको छ ।’ सम्मेलनमा प्राकृतिक प्रकोपबाट हुने क्षतिलाई बीमाबजारले कसरी न्यूनीकरण गर्न सक्छ भनेर छलफल गरिने उनको भनाइ छ । चापागाईंले सम्मेलनमा उठेका विषयवस्तुका आधारमा स्वदेशी नीति निर्देशन परिमार्जन गर्न समिति तयार रहेको बताए । उनले भने, ‘बीमाको प्रवर्द्धन र विकास गर्न समिति पछि पर्दैन । हामी कानूनी अवधारणाहरू समयानुकूल र अन्तरराष्ट्रिय स्तरको बनाउन चाहन्छौं ।’ आयोजकले सम्मेलनमार्फत नेपालका पर्यटकीय क्षेत्रको पनि प्रचारप्रसार हुने विश्वास लिएको छ । पर्यटनका लागि उपयुक्त मौसम परेकाले विदेशी पाहुनामार्फत पर्यटकीय क्षेत्रको पनि प्रचारप्रसार हुने आयोजकको भनाइ छ । एआईआरडीसीका उपाध्यक्ष विजयबहादुर शाहले सम्मेलन नेपाली बीमाबजारका लागि सुनौलो अवसर भएको बताए । उनले भने, ‘सम्मेलनमा विभिन्न देशका बीमा कम्पनी र नियामक निकायबीच एकै ठाउँ बसेर छलफल हुन्छ । यसरी छलफल गर्दा स्वदेशी कम्पनीहरूले बीमाका अन्तरराष्ट्रिय अवधारणाहरूबारे ज्ञान प्राप्त गर्न सक्छन् ।’ नेपाल पुनर्बीमा कम्पनीका प्रमुख कार्यकारी अधिकृत (सीईओ) चिरायु भण्डारीले सम्मेलन पुनर्बीमा व्यवसायका लागि पनि उपयोगी हुने बताए । उनले भने, ‘सम्मेलनमा विदेशी बीमा कम्पनीहरूको पनि सहभागिता रहने भएकोले हामी आफ्नो पुनर्बीमा व्यवसायको दायरा बढाउने पनि यसको उपयोग गर्ने उद्देश्य लिएका छौं ।’

प्रतिक्रिया [0]

पुरा नाम: *

इमेल: *

प्रतिकृया: *
पठाउनुहोस