ऊर्जामा लगानी बढाउन विश्व बैङ्कबाट ११ अर्ब ६३ करोड ऋण लिँदै सरकार

टीपी भुसाल

असोज २१, काठमाडौं  । सरकारले ऊर्जा क्षेत्रमा लगानी बढाउन रू. ११ अर्ब ६३ करोड ऋण लिने भएको छ । सरकारले विश्व बैङ्क समूहको अन्तरराष्ट्रिय विकास संस्थाबाट ऊर्जा क्षेत्रमा लगानी बढाउन उक्त रकमबराबरको ऋण स्वीकृत गर्न अर्थसचिवलाई अख्तियारी दिएको छ ।

साथै, आइतवार बसेको मन्त्रिपरिषद् बैठकले जापान सरकारले सिन्धुली सडक सुधारका लागि प्रदान गर्ने रू. १ अर्ब ४ करोड स्वीकृत गर्ने निर्णय गरेको सरकारका प्रवक्ता सञ्चार तथा सूचना प्रविधिमन्त्री गोकुल बाँस्कोटाले जानकारी दिए । मन्त्रिपरिषद् बैठकमा प्रधानमन्त्री केपी शर्मा ओलीले हालै संयुक्त राष्ट्रसङ्घको ७३औं महासभामा गरेको सम्बोधन, उक्त महासभामा सहभागी विभिन्न मुलुकका सरकार प्रमुख तथा राष्ट्र प्रमुखसँग गरेका दुईपक्षीय भेटवार्ता र आपसी सम्बन्ध विस्तारबारे भएको पहल तथा कोष्टारिका भ्रमणबारे प्रधानमन्त्री र परराष्ट्रमन्त्रीले जानकारी गराएका थिए । मन्त्रिपरिषद् बैठकले गोरखापत्र संस्थानको कार्यकारी अध्यक्षमा कृष्णमुरारी भण्डारीलाई नियुक्त गर्ने निर्णय गरेको छ । संस्थानका महाप्रबन्धक वसन्तप्रकाश उपाध्यायलाई तीन दिने स्पष्टीकरण सोधिएको र संस्थानका अध्यक्ष गोविन्द पोखरेलले दिएको राजीनामा स्वीकृत गरेको छ । बैठकले नागरिक लगानी कोषको सञ्चालकमा डा. रामचन्द्र भट्टराईलाई मनोनयन गरी सञ्चालक समितिको अध्यक्ष तोक्ने निर्णयसमेत गरेको छ । यस्तै, सरकारले श्रमजीवी पत्रकारको न्यूनतम पारिश्रमिक २५ प्रतिशतले वृद्धि गरेको छ । मन्त्रिपरिषद्को आइतवारको बैठकले पत्रकार तथा सञ्चार संस्थामा काम गर्ने सबै पत्रकार र कर्मचारीका लागि २५ प्रतिशतका दरले पारिश्रमिक वृद्धि गरेको हो । आगामी कात्तिक १ गतेदेखि लागू हुने गरी न्यूनतम पारिश्रमिक वृद्धि गरिएको बैठकपछि सरकारका प्रवक्ता गोकुलप्रसाद बाँस्कोटाले सञ्चारकर्मीलाई जानकारी दिए । श्रमजीवी पत्रकारले हाल न्यूनतम १९ हजार ५ सय पारिश्रमिक पाउँदै आएका छन् । सरकारले नेपाल प्रज्ञा प्रतिष्ठानको कुलपतिमा डा. गंगाप्रसाद उप्रेतीलाई नियुक्त गरेको छ । प्रधानमन्त्री ओलीले कुलपति डा. उप्रेतीलाई आइतवार नै सिंहदरबारमा पद तथा गोपनीयताको सपथ ग्रहण गराएका छन् । यसअघि पनि कुलपति रहेका उप्रेती आगामी चार वर्षका लागि कुलपति रहनेछन् ।

प्रतिक्रिया [0]

पुरा नाम: *

इमेल: *

प्रतिकृया: *
पठाउनुहोस