निजीक्षेत्रलाई ४४ दिनमा मात्रै विद्युतको भुक्तानी

दुर्गा लामिछाने

काठमाडौं । नेपाल विद्युत् प्राधिकरणले निजीक्षेत्रबाट उत्पादित विद्युत् खरीदको भुक्तानी, बिल प्राप्त भएको ४४औं दिनमा मात्रै गर्ने व्यवस्था शुरू गरेको छ । भुक्तानी प्रक्रियालाई व्यवस्थित गर्न यसो गरिएको प्राधिकरणका कार्यकारी निर्देशक कुलमान घिसिङले बताए । सबैजसो जलविद्युत् आयोजनासँगको विद्युत् खरीद सम्झौता (पीपीए)मा बिल प्राप्त भएको ४५ दिनभित्र भुक्तानी गरिसक्ने प्रावधान रहेको छ । तर निजीक्षेत्रले पहुँच र प्रभावका आधारमा जतिसक्दो छिटो भुक्तानी प्राप्त गर्ने क्रम बढेपछि प्राधिकरणले भुक्तानीको दिन नै निर्धारण गरेको हो । छिटै भुक्तानी पाए बैङ्कमा राखी ब्याज कमाइहाल्ने लोभले यस्तो क्रम बढेको देखिएपछि कडाइ गरिएको घिसिङको भनाइ छ । ‘संस्थागत सुधार गर्ने भनेको यी यस्तै कुराहरूको पनि सुधार हो,’ उनले भने, ‘निजीक्षेत्रको प्रभावमा आई मेरा कर्मचारी यस्ता चलखेलमा संलग्न नहोऊन् भन्ने उद्देश्यले यो व्यवस्था लागु गरिएको हो ।’ प्राधिकरणले निजीक्षेत्रका कम्पनीको खातामा सोझै भुक्तानी पठाउने गरेको छ ।

प्रतिक्रिया [0]

पुरा नाम: *

इमेल: *

प्रतिकृया: *
पठाउनुहोस