सरकारले तोकेको मूल्यमा सुगर मिलले उखु लिन नसक्ने, मिलले तोकेको मूल्यमा किसानले दिन नसक्ने

रोशनी भट्टराई

पुस ७, विराटनगर । प्रदेश नं.१ को एक मात्रै इस्टर्न सुगर मिलले सरकारले तोके अन्ुसारको उखुको मूल्य दिन नसकिने बताएको छ । सरकारले गत वर्ष नै प्रति क्वीन्टल पाँच सय ३० रुपैयाँ मूल्य तोकेको हो । गत वर्ष पनि सरकारले तोकेकोभन्दा कम मूल्य पाएका झापा, मोरङ र सुनसरीका उखु किसानहरुलाई मिलले यस पटक पनि उचित मूल्य दिन नसक्ने बताए पछि आक्रोषित भएका छन् । सरकारले उखुको समर्थन मूल्य प्रतिक्वीन्टल ५ सय ३० रुपैयाँ तोकेको छ । इस्टर्न सुगर मिलले गत वर्ष मिल घाटामा गएका कारण संचालन नै गर्न नसक्ने भन्दै सरकारले तोकेको मूल्यभन्दा ३० रुपैयाँ कममा किसानसँग उखु खरीद गरेको थियो । सुनसरीको बुर्ज गाउँपालिकास्थित ईष्टन सुगर मिललाई गत वर्ष मोरङ, सुनसरी र झापाका २ हजार ४ सय कृषकले उखु विक्री गरेका थिए । यो वर्ष मिलले गत वर्षको मूल्यमा उखु खरीद गर्न नसक्ने भन्दै संचालकहरुले मिल बन्द गरेका छन् । सरकारले चिनी आयातमा रोक लगाएको भएपनि व्यापारीले गत वर्ष नै भारत र पाकिस्तानबाट चिनी आयात गरेर भण्डारण गरेका कारण आफूहरुको चिनी गोदाममा थन्किरहेको मिलका संचालक हितेश गोल्छाले बताए । यो वर्ष किसानहरुले प्रति क्वीन्टल ३ सय ८५ रुपैयाँमा उखु दिए मात्रै खरीद गर्ने मिल संचालकको भनाइ छ । यता कृषकहरूले भने सरकारले तोकेको मूल्यअनुसार नै उखु खरीद गर्नुपर्ने माग गरेका छन् । मिल घाटामा गएको बताएपछि गत वर्ष नै सरकारले तोकेको भन्दा ३० रुपैयाँ कममा उखु विक्री गरेको किसानको गुनासो छ । मिलले भने अनुसार आफूहरुले उखु विक्री गर्दा लागत खर्चसमेत नउठ्ने किसानहरुले बताएका छन् । उखु किसान उमानाथ दंगालले भने, ‘लागत नै झन्डै ५ सयको हाराहारीमा छ, तर मिल संचालकले प्रति क्वीन्टल ३ सय ८५ मा उखु किन्न माग गरिरहेका छन । यस्तो स्थितीमा घाटा खाएर कसरी उखु दिन सकिन्छ ?’ वर्षभरी दुःख गरेर उब्जाउ गरेको बालीको प्रतिफल लिने बेलामा मिलले बार्गेनिङ गरेको उखु किसान बल्लव श्रेष्ठको भनाई छ । उनले भने ‘मिलले प्रतिक्वीन्टल ४ सय पनि दिन नसकिने बताएपछि हामी बिचल्लीमा परेका छौं । यो उखु दिएर हामी कहाँ जानु ? सरकारले यस विषयमा बोलिदिनु पर्याे ।’ इष्टन सुगर मिलले शुक्रबार सुनसरी र मोरङका केहि उखु किसानलाई विराटनरमा छलफलका लागि बोलाएको थियो । किसानहरुले मूल्य नघटाए मिल संचालन गर्न नसकिने भन्दै मिल संचालकले किसानहरुलाई दबाब दिएका छन् ।

प्रतिक्रिया [0]

पुरा नाम: *

इमेल: *

प्रतिकृया: *
पठाउनुहोस