तीन तहको सरकार चलाउन १ लाख ३८ हजार कर्मचारीको दरबन्दी तय, २१ दिनभित्र समायोजनको कार्य पूरा हुने

विजय दमासे

पुस ११, काठमाडौं । संघीय संरचना अनुसार तीनै तहको सरकार संचालन गर्न १ लाख ३८ हजार कर्मचारीको दरबन्दी टुङ्गो लागेको छ । ‘कर्मचारी समायोजन अध्यादेश, २०७५’ अनुसार सरकारका तिनै तह संघ, प्रदेश र स्थानीय तहमा काम गर्ने कर्मचारीको संख्या टुङ्गाइएको हो । संघीय मामिला तथा सामान्य प्रशासन मन्त्रालयका अनुसार देशभर १ लाख ३८ हजार १ सय ७८ दरबन्दी कायम गरिएको छ । नयाँ दरबन्दीअनुसार संघमा ४७ हजार ९ सय २०, प्रदेशमा २२ हजार ७ सय ५५ र स्थानीय तहमा ६७ हजार ५ सय ३ दरबन्दी रहने छन् । मन्त्रालयका कर्मचारी समायोजन तथा संगठन विकास महाशाखाका सहसचिव केदार प्रसाद पनेरुले यहि संरचना र दरबन्दीको आधारमा अब कर्मचारी समायोजन प्रक्रिया अघि बढ्ने बताए । सहसचिव पनेरुका अनुसार अबको २१ दिनभित्रमा कर्मचारी समायोजनको कार्य पूरा हुनेछ । स्थानीय निकायमा स्थायी कर्मचारीहरुको समायोजन गर्ने कार्य भने प्रायः सम्पन्न भइसकेको उनको भनाई छ । राष्ट्रिय किताबखानाबाट कर्मचारीको विवरण अद्यावधिक गर्नेे कार्य पनि चलिरहेको मन्त्रालयले बताएको छ । समायोजनको सूचना प्रकाशित हुनासाथ सबै स्थानीय तह, जिल्ला प्रशासन कार्यालय, जिल्ला समन्वय समिति, प्रदेश मुख्यमन्त्री तथा मन्त्रिपरिषद्को कार्यालय र सेवा सञ्चालन हुने हरेक कार्यालयहरुमा हेल्प डेस्कको स्थापना हुनेछ । मन्त्रालयले अध्यादेशप्रति असन्तुष्टि राख्दै आएका आधिकारीक ट्रेड युनियनसँग संवाद तथा छलफल गरी गुनासा सम्बोधन तथा नीतिगत अस्पष्टता भए त्यसलाई निराकरण गर्न कर्मचारी समायोजन गुनासो व्यवस्थापन समिति गठन गरेको छ । समितिले पहिलो चरणको प्रतिवेदन पेस गरिसकेको र निरन्तर संवाद तथा छलफलका माध्यमबाट बाँकी सुझावहरुलाई समेत मनन् गर्दै अगाडि बढ्ने पनेरुले बताए । कर्मचारीहरुको सेवा सुरक्षा, सुविधा र वृत्तिविकासका हकमा तहगत रुपमा कुनै पनि विभेद नगरिने पनि मन्त्रालयले स्पष्ट पारेको छ ।

प्रतिक्रिया [0]

पुरा नाम: *

इमेल: *

प्रतिकृया: *
पठाउनुहोस