अजयराज सुमार्गीले इन्भेस्टमेण्ट बैंकबाट निकालेको रकम फिर्ता गर्न सर्वोच्चको आदेश

विकास भट्टराई

पुस २६, काठमाडौं । सर्वोच्च अदालतको अन्तरिम आदेशपछि लामो समय बैंकमा अड्किएको पौने ३ अर्व रुपैयाँ निकालेका व्यापारी अजयराज सुमार्गीले उक्त रकम फिर्ता गर्नु पर्ने भएको छ । नेपाल इन्भेस्टमेन्ट बैंकबाट सुमार्गीले झिकेकोे सो रकम यथास्थितिमा राख्न सर्वोच्च अदालतले नेपाल राष्ट्र बैंक लगायतका निकायलाई आदेश दिएको छ । प्रधानन्यायाधीश चोलेन्द्र शमशेर जबरा र न्यायाधीश डा. आनन्दमोहन भट्टराईको संयुक्त इजलाशले सुमार्गीबाट झिकिएको रकम यथास्थितिमा राख्न आदेश दिएको हो । मंगलवारको संयुक्त इजलाशले उक्त आदेश दिएको भएपनि बिहीवार मात्र आदेशको पूर्ण विवरण आएको हो । सो विवरणमा व्यापारी सुमार्गीले बैंकमा रहेको रकम निकाल्न नपाउने र निकालिसकेको रकम समेत यथास्थितिमा राख्नुपर्ने आदेश दिएको छ । यहि पुस १० गते न्यायाधीश दीपकराज जोशीको एकल इजलाशले इन्भेस्टमेन्ट बैंकमा रहेको सुमार्गीको रकम झिक्न सक्ने गरी अन्तरिम आदेश दिएको थियो । जोशीको एकल इजलासले मुक्ति श्री सिमेन्टको नाममा आएको भनिएको रकम झिक्न मिल्ने गरी अन्तरिम आदेश जारी गरेको थियो ।  उक्त आदेश पछि सुमार्गीले पुस २१ गते बैंक खातामा लामो समय रोक्का रहेको झण्डै ३ अर्व रुपैयाँ झिकेका थिए । न्यायाधीश जोशीद्धारा दिइएको अन्तरिम आदेशलाई निरन्तरता दिने–नदिने सम्बन्धमा मंगलवार बहस भएको थियो । संयुक्त इजलाशले सुमार्गी विरुद्ध सम्पत्ति शुद्धिकरणमा अनुसन्धान गर्न पनि सम्पत्ति शुद्धिकरण विभागलाई सुझाव दिएको छ ।

प्रतिक्रिया [0]

पुरा नाम: *

इमेल: *

प्रतिकृया: *
पठाउनुहोस