रेल किन्न यातायात मन्त्रालयलाई स्वीकृति, पानी जहाज कार्यालय स्थापना हुँदै

टीपी भुसाल

माघ ३, काठमाडौं । सरकारले जी टु जी (दुई सरकारबीच खरीद विक्री) प्रक्रियामा रेल किन्ने भएको छ । यसको लागि मन्त्रिपरिषदले भौतिक पूर्वाधार तथा यातायात मन्त्रालयलाई स्वीकृति दिएको छ । आफ्नै रेल किनेर सञ्चालन गर्ने तयारी स्वरुप सरकारले रेल किन्ने निर्णय गरेको सरकारका प्रवक्ता एवम् सञ्चार तथा सूचना प्रविधिमन्त्री गोकुल बाँस्कोटाले जानकारी दिए ।

मन्त्रिपरिषदको बैठकका निर्णय सार्वजनिक गर्दै बिहीवार आयोजित नियमित पत्रकार सम्मेलनमा बोल्दै मन्त्री बाँस्कोटाले जनकपुर–जयनगर रेल सेवा फागुनदेखि नियमित सञ्चालन गर्ने तयारी गरेकोले रेल खरीद गर्न स्वीकृत प्रदान गरिएको बताए ।

सरकारले रेल किन्न यस अघि नै ५० करोड रूपैयाँ बजेट विनियोजन गरेको छ । भारतको जयनगरबाट नेपालको जनकपुर आउने दुई थान रेल किन्न १ अर्ब रूपैयाँ लाग्ने अनुमान गरिएपनि पहिलो चरणमा रेल खरीदका लागि सरकारले ५० करोड रूपैयाँ बजेट छुट्टाएको थियो । जयनगरदेखि नेपालको जनकपुरको कुर्थासम्म ३५ किलोमिटर रेल सञ्चालन हुन लागेको हो । रेलको लिक ओछ्याउने काम सम्पन्न भैसकेको छ ।

पानी जहाज कार्यालय पनि स्थापना हँदै यसैबीच, सरकारले पानी जहाज कार्यालय पनि स्थापना गर्ने भएको छ । मन्त्रिपरिषद बैठकले नेपाल पानी जहाज कार्यालयको संगठन संरचना र दरबन्दि स्वीकृत गरेको पत्रकार सम्मेलनमा मन्त्री बाँस्कोटाले जानकारी दिए । सप्तकोशीमा पानी जहाज सञ्चालनको प्रक्रिया शुरु भइरहेको बेला १६ जना कर्मचारीको दरबन्दिसहित पानीजहाज कार्यालय स्थापना गर्न लागिएको मन्त्री बाँस्कोटाले बताए । उनले भने, ‘अब कागजको पानी जहाज होइन साँच्चै पानी जहाज चलाउने गरी सरकार अघि बढेको छ ।’

प्रतिक्रिया [0]