टिपरको ठक्करबाट बालिकाको मृत्यु भएपछि आक्रोशित स्थानीयले आधा दर्जन टिपर जलाए, मोरङको सुन्दर हरैचामा निषेधाज्ञा जारी

रोशन तिवारी

माघ १४, विराटनगर । टिपरको ठक्करबाट ११ वर्षीया वालिकाको मृत्यु भएपछि मोरङको सुन्दरहरैंचा नगरपालिका–९ तनावग्रस्त बनेको छ । बालिकाको मृत्यु पछि आक्रोशित बनेका स्थानीयले आधा दर्जन बढी ट्रिपरमा आगजनी गर्दै प्रदर्शनमा उत्रिएपछि स्थानीय प्रशासनले विराटचौकदेखि बेलेपुरसम्म निषेधाज्ञा जारी गरेको छ । सोमवार विहान बिराटचौकबाट सुन्दर हरैंचातर्फ गइरहेको ना ३ ख ३३५५ नम्बरको टिपरले ठक्कर दिंदा सुन्दरहरैंचा–९ की ११ वर्षीया लक्ष्मी ढकालको मृत्यु भएको थियो । बाटो काट्दै गरेकी बालिकाको टिपरको ठक्करका कारण घटनास्थलमै मृत्यु भएको प्रहरीले बताएको छ । बालिकाको मृत्यूपछि आक्रोशित त्यहाँका स्थानीयले ठक्कर दिने टिपरसहित उक्त सडक खण्डमा गुडिरहेका अन्य टिपरहरुलाई समेत रोकेर आगजनी गरेका छन् । घटनाले उग्र रुप लिएपछि विराटचौक–बेलेपुरसम्मको तीन किलोमिटर क्षेत्रमा निषेधाज्ञा जारी गरेको मोरङका प्रमुख जिल्ला अधिकारी रमेशकुमार केसीले जानकारी दिएका छन् । विराटचौक, सिसौघारी, बेलेपुर र आसपासका क्षेत्रलाई लक्षित गरेर सोमवार विहान ११ः१५ बजेबाट निषेधाज्ञा जारी गरिएको छ । निषेधाज्ञाका बाबजुद स्थानीयले मृतक वालिकाको शव सडकमै राखेर प्रदर्शन गरिरहेका छन् । आधा दर्जन टिपरमा आगजनीको घटनापछि जिल्ला सुरक्षा समिति मोरङको आकस्मिक बैठकले निषेधाज्ञा जारी गर्ने निर्णय गरेको हो । अर्को आदेश नभएसम्मलाई निषेधाज्ञा घोषणा गरिएको बताइएको छ । निषेधाज्ञाको सूचना गराइएपनि स्थानीयले प्रदर्शनलाई भने जारी नै राखेका छन् ।

प्रतिक्रिया [0]

पुरा नाम: *

इमेल: *

प्रतिकृया: *
पठाउनुहोस