शाखा बढाउने शेयर ब्रोकरको तयारी : दीर्घकालीन व्यावसायिक आधार बनाउने रणनीति

प्रजिता बुढाथोकी

काठमाडौं । शेयरबजारमा कारोबार कम भई व्यापार घटिरहेको अवस्थामा ब्रोकर कम्पनीहरू शाखा विस्तारको तयारीमा जुटेका छन् । पहिला सञ्चालित अधिकांश शाखाहरू नै घाटामा चलिरहेको गुनासो गर्दै आएका ब्रोकरबाट नयाँ शाखा विस्तार भने रणनीतिक कदम भएकोे बुझिएको छ । वाणिज्य बैंकहरूले पनि सहायक कम्पनी मार्फत शेयर ब्रोकरिङको काम गर्ने सम्भावना बढेपछि शेयर ब्रोकर कम्पनीहरू व्यावसायिक आधार विस्तारमा जुटेका हुन् । राजधानी केन्द्रित शेयरबजार विस्तारका लागि नेपाल धितोपत्र बोर्डले पहल गरिरहेको अवस्थामा उत्पयकामै सोचे अनुसार शेयर व्यापार हुन नसकेको ब्रोकरहरूको भनाइ छ । अहिले काठमाडौंका केन्द्रीय कार्यालय सहित देशभर १३ जिल्लाका ४१ स्थानमा शेयर ब्रोकर कम्पनीको उपस्थिति छ । अधिकांश शाखामा सोचे अनुसारको व्यवसाय नभएको गुनासो गरे पनि आठ ब्रोकर कम्पनीले थप शाखा विस्तारका लागि अनुमति पाएका छन् । ती कम्पनीले केही दिनअघि मात्र बोर्डबाट शाखा स्थापनका लागि आवश्यक पूर्वाधार तयार गर्न अनुमति पाएका हुन् । उपत्यका केन्द्रित ब्रोकरको पहुँच देशव्यापी विस्तार गर्न बोर्डले ब्रोकरहरूलाई शाखा विस्तारको वातावरण बनाएको हो । यसका लागि धितोपत्र व्यवसायी नियमावलीलाई संशोधन गर्ने गृहकार्यमा बोर्ड रहेको छ । शेयरबजार पूर्ण प्रविधिमैत्री बनिसकेको अवस्थामा नियमावलीमा संशोधन गर्नुपर्ने बुँदाहरू ब्रोकरहरूले बोर्डलाई बुझाइसकेका छन् । उनीहरूले पूर्वाधारमा तय गरेका यसअघिका विषयमा बोर्डले परिमार्जन गरेर लैजानुपर्ने सुझाव राखेको जानकारी दिएका छन् । बोर्डले धितोपत्र दलाल व्यवसायीको सञ्चालन नीतिमा पुनरवलोकन गर्न, वाणिज्य बैंकको सहायक कम्पनी तथा धितोपत्र दलाल व्यवसायीलाई गाभ्ने/गाभिने सम्बन्धमा नीतिगत व्यवस्था गर्न नियमावली संशोधनका लागि गृहकार्य अघि बढाइएको बताएको छ । नियमावलीमा थप व्यवस्था गरेपश्चात् मात्र धितोपत्र दलाल व्यवसायीको शाखा कार्यालय स्थापना कार्यलाई अझ व्यवस्थित बनाउने प्रक्रिया अघि बढाइने बोर्डको भनाइ छ । अहिलेको बजारको अवस्थामा कुनै पनि ब्रोकरका शाखाबाट सोचे अनुसारको व्यवसाय नभइरहँदा भविष्यको व्यावसायिक आधार तयार गर्न थप शाखा सञ्चालनमा लागेको ब्रोकरहरू बताउँछन् ।

प्रतिक्रिया [0]

पुरा नाम: *

इमेल: *

प्रतिकृया: *
पठाउनुहोस