धान, गहुँ, मकै छोडेर पूरै गाउँमा केराखेती, वार्षिक ५० लाख आम्दानी

ध्रुवसागर शर्मा

माघ २८, म्याग्दी । म्याग्दीको बेनी नगरपालिका–२ खबरा गाउँका सबै कृषकले केरा खेती गरेका छन् । करीब १८ हेक्टर क्षेत्रफलमा गरिएको केराखेती सफल भएपछि खबरा गाउँको मुहार नै फेरिएको छ । धान, गहुँ, मकै, कोदो बालीको विकल्पमा यहाँका कृषकले केरा खेती गरेको डेढ वर्षमै लाखौं रुपैयाँ आम्दानी लिन थालेका छन् । अन्य अन्नबालीलाई जस्तो धेरै मेहनत र श्रम खर्च गर्नु नपर्ने केराखेती आम्दानीको गतिलो माध्यम बनेको स्थानीय कृषकहरुले बताएका छन् । यहाँका कृषकले केरा बेचेर मात्रै गाउँमा वार्षिक ५० लाख रुपैयाँ भित्र्याउने गरेको पाइएको छ । केही वर्षअघिसम्म परम्परागत खाद्यान्न बाली लगाइने खबरा अहिले केराको बगैँचामा परिणत भएको छ । अनुकूल हावापानी, बजारको सुविधा र छिटो आम्दानी गर्न सकिने भएकाले व्यावसायिक केरा खेतीतर्फ आकर्षण बढेको अगुवा कृषक नारायण सापकोटाले बताए । ‘यहाँका सबै कृषकले केरा खेती गरेका छन्, गाउँको करीब १८ हेक्टर क्षेत्रफलमा केरा खेती गरिएको छ ।’ सापकोटाले भने, ‘खबराको मुख्य आम्दानीको स्रोत भनेकै केरा खेती हो ।’ सापकोटाका अनुसार विगत ३ वर्षदेखि यहाँका कृषकले व्यावसायिक केरा खेती शुरु गरेका हुन् । करीब डेढ सय घरधुरीको बसोवास रहेको खबराका बासिन्दाले केही वर्षयता खेतबारी, कान्ला, खोल्सा, खरबारी जताततै केराखेती गरेका छन् । खबराकी कृषक महिला तारा कुँबरको जीवनस्तर पनि केरा खेतीबाटै फेरिएको छ । वार्षिक ३ लाख रुपैयाँको केरा विक्री गर्दै आएकी उनले केरासँगै तरकारी खेती पनि गरेकी छिन् । ‘वार्षिक २ देखि ३ लाख रुपैयाँसम्म केरा बेचेर कमाइ हुन्छ, यहाँको आम्दानीको मुख्य माध्यम भनेकै केरा खेती हो, कँुबरले भनिन् । मजदूर अभावमा खाद्यबाली हुने जमीन बाझिन थालेको अवस्थामा केराखेती प्रभावकारी विकल्प बनेको स्थानीयवासी बलबहादुर कँुबरले बताए । खबराको केरा बेनीमा खपत हुन्छ । केरा विक्रीबाट मासिक रू. ५० देखि ६० हजार आम्दानी हुने कुँबरले बताए । दैनिक पाँच भारीको अनुपातमा खबराबाट बेनीमा केरा विक्रीका लागि ल्याउने गरिएको छ । बेनी नजिकै भएकाले कृषकलाई बजारको समस्या छैन् । खबरामा केरा उत्पादन हुन थालेपछि बेनीमा बाह्य जिल्लाबाट केराको आयात घटेको फलफूल व्यापारीहरुले बताएका छन् । बेनी नगरपालिकाले खबरालाई केरा गाउँ बनाउने लक्ष्यसहित ‘एक वडा एक उत्पादन कार्यक्रम’ सञ्चालन गरेको वडा अध्यक्ष हीराबहादुर थापाले बताए । केरा खेतीसम्बन्धी कार्यक्रमका लागि यस वर्ष रू.तीन लाख विनियोजन भएको छ ।

प्रतिक्रिया [0]

पुरा नाम: *

इमेल: *

प्रतिकृया: *
पठाउनुहोस