आर्थिक मन्दीले पुरूषमा आत्महत्या बढायो

Krishna Giri

सन् २००८ बाट शुरु भएको विश्वव्यापी आर्थिक मन्दीले कैयौं पश्चिमा देशमा आर्थिक सङ्कटमात्र निम्त्याएन, उक्त मन्दीले अर्को एक खतरनाक समस्या पनि ल्याएको छ । सो समस्या भनेको मानिसमा भएको आत्महत्या हो । सो मन्दीका कारण सन् २००८ देखियता विश्वमै उक्त मन्दी रहेका देशमा पुरूषहरुको आत्महत्याको दरमा पनि वृद्धि भएको छ । मङ्गलवार फ्रान्सको राजधानी पेरिसमा सार्वजनिक गरिएको एक अध्ययनमा सो अवस्था देखिएको छ । सन् २००८ पछिको सो अध्ययन आर्थिक मन्दीको समस्या देखिएका ५४ देशका १५ वर्षमाथिका व्यक्तिमा गरिएको हो । ती देशमा उक्त मन्दीको शुरूआत भएको समयभन्दा पहिला र पछिको अवस्थालाई लिएर मानिसमा भएको आत्महत्या दरको अध्ययन गरिएको छ ।

सन् २००९ मा गरिएको पहिलो वर्षको सो अध्ययनमा यसअघिको वर्षमा भन्दा ४ हजार ८८४ जनाभन्दा बढीले आत्महत्या गरेका थिए । त्यसपछिका वर्षहरुमा पनि आत्महत्याको दर महिलामा भन्दा पुरूषमा बढी देखिएको छ । सो अवस्था सबैजसो नै मन्दीको बढी प्रभाव परेका देश पश्चिमा र यूरोजोनमा रहेको छ । उक्त अध्ययनले देखाएबमोजिम सन् २००९ मा मन्दीको बढी प्रभाव परेको यूरोपेली क्षेत्रका २७ देशमा बढी देखिएको हो । ती देशमा पहिलो वर्षको तुलनामा ४ दशमलव २ प्रतिशतले बढेको थियो । त्यसैगरी मन्दीको बढी प्रभाव परेका देशमा क्यारेबियन र ल्याटिन अमेरिकी देशहरु रहेका छन् । ती देशमा सो वर्ष ६ दशमलव ४ प्रतिशत बढी आत्महत्याका घटना भएका छन् । त्यसपछिका वर्षहरुमा पनि पुरूषहरुमा आत्महत्याको क्रम बढ्दो मात्रामा रहेको छ ।

हालैमात्र गरिएको पछिल्लो उक्त सर्वेक्षणले यूरोपेली देशका पुरूषहरुमा आत्महत्याको दर ११ प्रतिशतले वृद्धि भएको देखाएको छ । ब्रिटिश मेडिकल जर्नलमा प्रकाशित सो अनुसन्धान प्रतिवेदनले यूरोपेली क्षेत्रमा सो दर १५ देखि २४ वर्षको समूहका पुरूषमा देखिएको छ । तर, अमेरिकी देशहरुमा भने सो आत्महत्याको अवस्था ४५ वर्षभन्दा माथिका पुरूषमा बढीमात्रामा प्रचलित छ । ती पुरूषहरुको आत्महत्याको दरमा ५ प्रतिशतले वृद्धि भएको पाइएको सो अध्ययनले देखाएको छ । पहिलाका वर्षहरुको तुलनामा सन् २००९ पछि यूरोपेली देशहरुमा बेरोजगारी दरमा ३५ प्रतिशतसम्म पनि वृद्धि भएको थियो । त्यसैगरी अमेरिकी तथा क्यारेबियन देशहरुमा रोजगारी करीब २३ प्रतिशतले बढेको तथ्याङ्क सार्वजनिक भएको थियो । रासस/एएफपी

प्रतिक्रिया [0]