भैरहवा र जनकपुर नयाँ हवाई प्रवेश विन्दु

टीपी भुसाल

‘क्रशबोर्डर एयर इन्ट्री रूट’का लागि दुवै देशको आइकाओमा आवेदन काठमाडौं । भैरहवा र जनकपुरबाट क्रशबोर्डर हवाई प्रवेश विन्दु दिन भारत सहमत भएको छ । त्यससँगै क्रशबोर्डर हवाई प्रवेश रूट बनाउन नेपाल र भारतले अन्तरराष्ट्रिय नागरिक उड्डयन संस्था (आइकाओ) मा संयुक्त आवेदन दिएका छन् । नेपालले भारतसँग नेपालगन्ज र महेन्द्रनगर रूट पनि मागेको थियो । तर, हाललाई भैरहवा र जनकपुर रूटमा सहमति दिएको नेपाल नागरिक उड्डयन प्राधिकरणका महानिर्देशक सञ्जीव गौतमले जानकारी दिए । हालसम्म ती विन्दु हुँदै विमानहरू भारततर्पm जान मात्र पाउँथे । उक्त सहमतिसँगै नेपाल आउने विमान पनि ती विन्दुबाट भित्रिन पाउनेछन् । महानिर्देशक गौतमका अनुसार दुवै मुलुकले ‘इन्ट्री रूट’को उडान कार्यविधि र ‘वाई डाइरेक्शन’ निर्माण गर्न आइकाओमा संयुक्त आवेदन दिएको हो । ‘आइकाओले अध्ययन गरेपछि उडान कार्यविधिसहितको क्याटलग निकाल्छ । त्यसपछि मात्र रूट स्थापित हुन्छ,’ उनले भने । भैरहवा रूटबाट विमानले प्रवेश विन्दु पाएपछि नयाँदिल्ली तथा पश्चिमी क्षेत्रबाट आउने विमानलाई सिमराको तुलनामा सहज र छोटो पर्ने गौतमले बताए । यसबाट पोखरा विमानस्थललाई पनि धेरै सहज हुने उनले जानकारी दिए । भारतले गत असारमा भैरहवा र जनकपुरसँगै विराटनगर, नेपालगञ्ज र महेन्द्रनगरबाट पनि प्रवेश विन्दु दिन सहमति दिएको थियो । तर, त्यसको सुरक्षा मूल्यांकन (सेफ्टी एसेसमेन्ट) गर्न थप समय लाग्ने र भैरहवास्थित गौतमबुद्ध अन्तरराष्ट्रिय विमानस्थल २०७६ असोजसम्ममा सञ्चालनमा आउने भएकाले भारतसँग यी रूटमा सहमति भएको महानिर्देशक गौतमले बताए । गौतमबुद्ध अन्तरराष्ट्रिय विमानस्थल निर्माणको काम करीब ७० प्रतिशत सकिएको प्राधिकरणले जानकारी दिएको छ ।

प्रतिक्रिया [0]

पुरा नाम: *

इमेल: *

प्रतिकृया: *
पठाउनुहोस