मार्जिन कारोबारको स्वीकृति दिन नेप्सेलाई बाटो खुल्यो, राष्ट्र बैंकको निर्देशिकामा संशोधन

ममता थापा

चैत १४, काठमाडौं । नेपाल स्टक एक्सचेञ्ज (नेप्से)मार्फत मार्जिन कारोबारको लागि स्विकति प्रदान गर्न बाटो खुलेको छ । यसअघि नेप्सेको कार्यविधि र नेपाल राष्ट्र बैंकको निर्देशन फरक परेकाले मार्जिन कारोबारका लागि ब्रोकर कम्पनीलाई नेप्सेले स्वीकृति प्रदान गर्न सकेको थिएन । राष्ट्र बैंकले एकिकृत निर्देशिकामा बिहीवार संशोधन गर्दै सो कारोबारको लागि ब्रोकरहरूले नेप्सेबाट स्वीकृति लिनुपर्ने व्यवस्था गरेकोले बाटो खुलेको हो ।

केन्द्रीय बैंकले गत पुस ११ मा जारी गरेको निर्देशनमा ‘मार्जिन कारोबारका लागि नेपाल धितोपत्र बोर्डको सिफारिसमा स्वीकृति प्रदान गरिने’ भन्ने अस्पष्ट व्यवस्था थियो । यता नेप्सेले तयार गरेको कार्यविधिमा भने मार्जिन कारोबार सुविधा उपलब्ध गराउन इच्छुक धितोपत्र दलाल व्यवसायी (ब्रोकर कम्पनी)ले नेप्सेबाट अनुमति प्राप्त गर्नुपर्ने उल्लेख छ । ब्रोकर कम्पनीबाट प्राप्त निवेदन तथा कागजात जाँचपछि सन्तोषजनक देखिएमा नेप्सेले मार्जिन कारोबार सेवा उपलब्ध गराउने अनुमति प्रदान गर्न सक्नेछ र त्यसको जानकारी बोर्डलाई गराउने नेप्सेको कार्यविधिमा व्यवस्था छ ।

यस्तो बाझिएको व्यवस्थाका कारण नेप्सेबाट स्वीकृति दिन ढिलाइ भएको थियो । सो अस्पष्ट व्यवस्थालाई स्पष्ट पार्न नेप्सेले राष्ट्र बैंकलाई पत्र समेत पठाएको थियो । अबको व्यवस्थाअनुसार नेप्सेलाई स्वीकृति दिने अधिकार छ । तर नेपाल धितोपत्र बोर्डको नीति तथा निर्देशनलाई पालना गर्नुपर्ने छ । साथै, मार्जिन कारोबारको स्वीकृति दिँदा नेपाल राष्ट्र बैंक ऐन, २०५८ को दफा ७६ अनुसार स्वीकृति दिन नेप्सेलाई निर्देशन दिइएको परिपत्रमा उल्लेख छ । नेप्सेका अनुसार नीतिगत अस्पष्टताकै कारण स्वीकृतिको प्रक्रिया अगाडि बढाउन नसकिएको हो ।

नेप्सेमा हालसम्म मार्जिन कारोबार सुविधा उपलब्ध गराउन १४ ओटा ब्रोकर कम्पनीले निवेदन दिएका छन् । तीमध्ये आधाभन्दा बढी कम्पनीले प्रक्रिया पूरा गरी निवेदन दिए पनि नीतिगत अन्योलले स्वीकृति प्रदान गर्न नसकिएको नेप्सेले बताएको छ ।

नेप्सेले गत फागुन १४ मा सूचना जारी गरी ब्रोकरहरूसँग मार्जिन कारोबारका लागि आवेदन मागेको थियो । कारोबारको स्वीकृति माग्नेहरुः

प्रतिक्रिया [0]