न्यूनतम आम्दानी निश्चित गर्न जनमत सङ्ग्रह !

Oct 21, 2013

र यो पनि

देशको सरकार चयनका लागि वा कुनै पनि कम्पनी वा समूहको सञ्चालक समिति चयन गर्न मतदान गर्ने गरेको हामी सबैलाई थाहै छ । तर, स्वीट्जरल्याण्डमा भने सबै वयष्कलाई न्यूनतम मासिक आम्दानी सुनिश्चित गर्न प्रस्तावमा मतदान गरिने भएको छ । सबै वयष्कको मासिक न्यूनतम आम्दानी २ हजार ८ सय डलर (२ हजार ५ सय स्वीस फ्र्याङ्क) हुनुपर्ने माग राखी स्वीट्जरल्याण्डका करीब १ लाख नागरिकले सरकारसमक्ष हस्ताक्षरसहितको मागपत्र हालै बुझाएका छन् ।
सरकारसमक्ष यस्तो खाले प्रस्ताव औपचारिक रुपमा राख्दा १ लाख २० हजार नागरिकको हस्ताक्षर आवश्यक हुन्छ । यस योजनाको समर्थनमा गरिएको एक सार्वजनिक प्रदर्शनमा एउटा ट्रकबाट ५ सेण्टका ८० लाख सिक्का सडकमा छरिएको थियो । स्वीस नागरिकको सङ्ख्या पनि करीब ८० लाख नै छ । यस विषयमा मतदानको औपचारिक मीति निर्धारण गर्न बाँकी नै भए तापनि सन् २०१४ को शुरूआतमै यो सम्पन्न हुने सम्भावना रहेको छ ।

यस प्रस्तावित योजनाका लागि देशको सामाजिक बीमा प्रणालीबाट रकम जुटाइने प्रस्ताव छ । सामाजिक बीमा प्रणालीले यसअघि पनि सबै नागरिकको स्वास्थ्य सेवा तथा अन्य सामाजिक सुरक्षा व्यवस्थाका लागि रकम जुटाउँदै आएको छ ।

जनमतसङ्ग्रहको माग गर्न चाहिने जनताको न्यूनतम सङ्ख्या अपेक्षाकृत कम रहेकाले स्वीट्जरल्याण्डमा हरेक वर्ष सार्वजनिक विषयमा जनमतसङ्ग्रह हुने गरेको छ । उदाहरणका लागि, आगामी नोभेम्बर २४ तारिखमा पनि एउटा जनमतसङ्ग्रह हुँदैछ, जसमा राखिएको प्रस्ताव पारित भएमा स्वीट्जरल्याण्डका कम्पनीहरुका अधिकारीहरुले पाउने तलब सोही कम्पनीका तल्लो तहका कर्मचारीबराबर हुनेछ ।

यदि यो प्रस्ताव सर्वसम्मतिले पारित भएमा आफ्नो कम्पनीलाई देशबाहिर लैजानेबारे आफूले विचार गरिरहेको स्वीट्जरल्याण्डका एक प्रमुख कार्यकारी अधिकृतले बताएका छन् । ‘स्वीट्जरल्याण्डले अर्थतन्त्रमा यति ठूलो हानि गर्छ भन्ने कुरा म विश्वास नै गर्न सक्दिनँ,’ ग्लेनकोरका प्रमुख कार्यकारी अधिकारी इभान ग्लानसवर्गले स्वीस ब्रोडकाष्टिङ कर्पोरेशनलाई भने । ‘मैले यो कम्पनीको प्रमुखको नाताले नभई स्वीस नागरिकको हैसियतले भनेको हुँ,’ उनको कथन छ । यस कदमको प्रभाव नेस्ले, नोभार्टिस र रोचेलगायतका स्वीस कम्पनीहरुमा पनि दुखद हुने ग्लेनकोरको दाबी छ ।