तीनओटा रिसोर्टका लागि साझेदार खोज्दै तारागाउँ

Apr 18, 2019

समाचार मुख्य खबर

हिमा वि.क. ‘बुट मोडल’मा चलाउन प्रस्ताव, ३० वर्षसम्म लीजमा दिने योजना काठमाडौं । तारागाउँ विकास समितिले हाल सञ्चालनमा रहेका तीनओटा रिसोर्ट/होटलमा निजीक्षेत्रसँग साझेदारी गर्न निर्माण–स्वामित्व–सञ्चालन–हस्तान्तरण (बूट) मोडलको प्रस्ताव गरेको छ । नगरकोटस्थित तारागाउँ रिसोर्ट २०४२ सालदेखि सञ्चालनमा छ । पोखरा र ककनीस्थित रिसोर्ट भने २०४५ देखि सञ्चालनमा आएका हुन् । पहिलो चरणमा ककनी र पोखराका होटललाई बुट मोडलमा लैजाने तथा नगरकोटको होटललाई भने जग्गाका केही प्रक्रिया पुर्‍याएर यो अवधारणामा अगाडि बढाउने समितिको तयारी छ । बूट अवधारणामा सञ्चालन हुने योजना अनुसार ती होटल ३० वर्षसम्मका लागि भाडामा दिने तयारी समितिको छ । तीनओटै होटलको कुल क्षेत्रफल ५० रोपनी छ । समितिका अध्यक्ष नारदकुमार लुइँटेलका अनुसार समितिले २०७३ सालमै संस्कृति, पर्यटन तथा नागरिक उड्डयन मन्त्रालयमा त्यससम्बन्धी प्रस्ताव गरेको थियो । ‘करीब २ महीनाअघि मात्रै यो प्रस्ताव मन्त्रिपरिषद्मा पुगेको छ,’ उनले भने, ‘प्रस्ताव स्वीकृत भएपछि भाडादर तोकेर टेन्डर आह्वान गरिनेछ ।’ उनका अनुसार आर्थिक वर्ष २०४२/४३ देखि नै सरकारले नेपालका डाँडाकाँडामा पर्यटनको सम्भावना रहेको बताउँदै पर्यटकीय योजना अगाडि सारेको थियो । ‘त्यतिबेला सरकारले पर्यटनमा निजीक्षेत्र आउँछ भन्ने लक्ष्य लिएको थियो । सोही अनुसार अहिले सरकारीभन्दा निजीक्षेत्रलाई नै अग्रसर बनाउन यो अवधारणा अपनाउने तयारी छ,’ लुइँटेलले भने । पोखरा, ककनी र नगरकोटमा त्यसअघि नै बनेका दरबारलाई समितिले होटलको रूप दिएको थियो । अहिले ती भवन पुराना र जीर्ण भएकाले जीर्णोद्धारको काम अगाडि बढाउन आवश्यक देखिएको समितिको भनाइ छ । पर्यटनका ‘प्राइम लोकेशन’मा सरकारी स्वामित्वमा रहेका होटलहरू राम्रोसँग सञ्चालन हुन सकेका छैनन् । सोही कारण निजीक्षेत्रको सहभागितामा ती होटल सञ्चालन गर्ने र त्यसबाट आएको नाफाबाट खप्तड, रारा लगायत मुख्य पर्यटकीय इलाकामा थप होटल खोल्ने समितिको योजना छ । समितिले सामुदायिक ग्रामीण रिसोर्ट, होम स्टे अध्ययन, ग्रामीण पर्यटन योजना र गुरुयोजना, साना पर्यटन पूर्वाधार विकासमा काम गर्दै आएको छ । होमस्टे, विभिन्न जिल्लामा पर्यटनसँग सम्बद्ध तालीम तथा गोष्ठीहरू पनि समितिले गर्दै आएको छ । समितिको काठमाडौंको पाँचतारे होटल हायातमा समेत लगानी छ ।