मोरङका उद्योगी व्यवसायीले अर्थमन्त्रीसँग राखे १८ बुँदे माग

रोशनी भट्टराई

१५ प्रतिशत नगद अनुदानदेखि सगरमाथाको बाटो बनाउन माग विराटनगर । मोरङका उद्योगी व्यवसायीले औद्योगिक विकासका लागि विभिन्न १८ बुँदे माग राखेका छन् । उनीहरूले औद्योगिक विकासँगै आवश्यक पूर्वाधार निर्माण, वस्तु आर्यातनिर्यातमा सहुलियत, ऊर्जाको व्यवस्थापन लगायत माग अर्थमन्त्री डा. युवराज खतिवडा समक्ष अघि सारेका हुन् । आर्थिक वर्ष २०७६/०७७ को बजेट, राजस्व नीति तथा कार्यक्रम तर्जुमा सम्बन्धी छलफल तथा अन्तरक्रिया कार्यक्रममा मोरङ व्यापार संघ र उद्योग संगठन मोरङमा आबद्ध उद्योगी व्यापारीले निर्यातमा नगद अनुदान दिई व्यापारघाटा न्यूनीकरण गर्न समेत अर्थमन्त्रीको ध्यानाकर्षण गराएका थिए । कार्यक्रममा उद्योग संगठन मोरङ र मोरङ व्यापार संघले संयुक्त रूपमा तयार पारेको कार्यपत्र मोरङ व्यापार संघका अध्यक्ष पवनकुमार शारडाले अर्थमन्त्री खतिवडा समक्ष प्रस्तुत गरेका थिए । उनले आयात हुने मालवस्तुको ३० प्रतिशत भ्यालु अडिटमा ५ प्रतिशत, ५० प्रतिशतमा १० प्रतिशत र ७० भन्दा माथिमा भ्यालु अडिट भएको उद्योगमा १५ प्रतिशत नगद अनुदान दिने व्यवस्था सरकारले गर्नुपर्ने बताएका थिए । उनले सरकारले यथासक्य औद्योगिक ग्रामका लागि जग्गा व्यवस्थापन गरिदिन सरकारसँग आग्रह गरेका छन् । सेजको अवधारणा उपयुक्त नभएको भन्दै शारडाले प्रदेश नं १ को सुनसरी जिल्लास्थित अमडुवामा रहेको साल्ट्र ट्रेडिङ कम्पनीको ६५० बिगाहा जग्गामा विद्युत्, सडक, पानी, सुरक्षा व्यवस्था लगायत भौतिक पूर्वाधार विकास गरी उद्योग ग्रामको स्थापना गरिदिन सरकार समक्ष माग राखेका हुन् । उनले स्वदेशी उद्योगको संरक्षणका लागि एन्टी डम्पिङ एक्ट तर्जुमा गरी शीघ्र कार्यान्वयनमा ल्याई स्वदेशी उद्योगलाई संरक्षित गरिनुपर्नेमा समेत जोड दिए । उनले उत्पादनमूलक उद्योगको हकमा जारी भएका मुअ कर र आय कर गणनालाई वार्षिक रूपमा नवीकरण गराउनुपर्ने एवम् ३ लाखको बैंक ग्यारेन्टी राख्नुपर्ने प्रावधान खारेज गरिनुपर्ने माग राखेका थिए । आयातित कच्चा पदार्थ तथा तयारी वस्तुमा महसुल दरको फरक कम्तीमा १५ प्रतिशत हुनुपर्ने नीति ल्याउन उनले सरकारसँग माग राखेका छन् । सगरमाथासम्मको बाटो बनाउने कार्यमा बजेट विनियोजन गरी काम अगाडि बढाई आन्तरिक तथा बाह्य पर्यटन बढाउने लगायत सडक निर्माण कार्यलाई शीघ्रता दिनुपर्नेमा समेत उनको जोड थियो । बैंकहरूको स्प्रेडदर साढे ९ प्रतिशत हुँदा नबोल्ने व्यवसायी स्प्रेडदर साढे ४ प्रतिशतमा झरेपछि चर्को ब्याजदर भयो भनेर विरोधमा उत्रिएकोप्रति डा. अर्थमन्त्री खतिवडाले आश्चर्य व्यक्त गरे । व्यापारमा १ दिनमै पनि नाफा हुने तर बैंकले लिने ब्याज वार्षिक भएकाले बैंकले लिने ब्याज र व्यापारको मुनाफा तुलना गर्ने कुरा नभएको अर्थमन्त्री डा. खतिवडाको भनाइ थियो ।

प्रतिक्रिया [0]

पुरा नाम: *

इमेल: *

प्रतिकृया: *
पठाउनुहोस