निगमले असार १९ देखि ओसाका उडान गर्दै, दुई वाइडबडीले काम पाउने (कुन–कुन बार उड्छन् ?)

टीपी भुसाल

वैशाख २०, काठमाडौं । नेपाल वायुसेवा निगमले वाइडबडी जहाजमार्फत जापानको ओसाकामा नियमित उडान पुनः शुरु गर्ने भएको छ । निगमको ६१औं वर्ष प्रवेशका अवसरमा निगमले असार १९ गते (जुलाई ४ तारिख) देखि ओसाकाको नियमित उडान शुरु गर्ने निगमले जानकारी दिएको छ ।

निगमले गत फागुनदेखि नै उडानको सम्पूर्ण तयारी पूरा गरेपनि जापान सिभिल एभिएशन ब्युरो (जेक्याब)बाट उडान अनुमति प्रमाण–पत्र (एओसी) प्राप्त गर्न ढिला भएकोले हालसम्म उडान हुन सकेको थिएन । गत हप्तामात्रै निगमले एओसी पाएको थियो ।

निर्धारित उडान तालिका अनुसार ओसाकाको सबै उडानहरु वाइडबडी ए ३३०–२०० बाट हप्ताको तीन (३) ओटा उडान मंगलवार, बिहीवार र शनिवार हुने छन् । काठमाडौंबाट बिहान २ बजेर ३० मिनेटमा ओसाकाका लागि उडेको विमान स्थानीय समय अनुसार दिनको ११ बजेर ५५ मिनेटमा ओसाका पुग्नेछ र ओसाकाबाट स्थानीय समय अनुसार १ बजेर ५५ मिनेटमा उडान गरी सोही दिन अपरान्ह ६ः०० बजे काठमाडौं आइपुग्ने निगमले जानकारी दिएको छ ।

यस अघि सन् २००७ सम्म निगमले चीनको सांघाई हुंदै ओसाकासम्म उडान गर्दै आएको थियो र तत्कालिन समयमा विमानको कमीका कारण जापान उडान स्थगित गरिएको थियो । सन् २००० मा जापानबाट काठमाडौंका लागि सबैभन्दा बढी ४१ हजार ७० जनाले नेपाल यात्रा गरेका थिए । जसमध्ये नेपाल वायुसेवा निगमको विमानबाट करीब २२ हजार यात्रु आएका थिए । राष्ट्रिय ध्वजाबाहकको सेवा नभएपछि यात्रु संख्या घट्दै गएर सन् २०१५ मा १७ हजार ६१३ यात्रुमा सीमित भएको थियो ।

निगमले ओसाका र नारितामा हप्ताको चार उडान थालेपछि वार्षिक सिट क्षमता ५७ हजार हुने र यसबाट यात्रु संख्या बढ्न गई नेपालको अर्थतन्त्रमा सकारात्मक परिणाम ल्याउने निगमका कार्यकारी अध्यक्ष मदन खरेलले जानकारी दिए ।

निगमको गृष्मकालीन तालिका अनुसार काठमाडौं–ओसाका र ओसाका–काठमाडौं उडान एक तर्फी करीब ६ घण्टा ३० मिनेटको हुनेछ । दोश्रो चरणमा जापानको व्यस्त विमानस्थल नारितामा समेत नियमित उडान गर्ने योजना बनाई तदनुरुप प्रक्रिया अगाडि बढाइएको छ । टोकियोको नारितामा उडान शुरु गरेपछि दुवै गन्तव्यका लागि हप्तामा दुई–दुई ओटा उडान गर्ने योजना रहेको छ ।

जापान उडानसंगै निगमको अन्तरराष्ट्रिय बजार हिस्सा बढ्ने छ । निगमले लामो गन्तव्यमा उडाने भन्दै ल्याएको वाइडबडीले गन्तव्य नपाउँदा छोटो दूरीकै गन्तव्यमा आधा क्षमतामा उडिरहेका थिए । जापान उड्न थालेपछि वाइडबडिले काम पाउने छन् । नेपाल–जापान बीचको द्विपक्षीय हवाइ सम्झौताअनुसार नेपालका एयरलाइन्सहरूले जापानको हानेडा विमानस्थल बाहेकका सबै विमानस्थलमा उडान तथा अवतरण गर्न पाउने छन् । नेपालले हालसम्म ३९ देशसँग हवाई सम्झौता गरेको छ ।

प्रतिक्रिया [0]

पुरा नाम: *

इमेल: *

प्रतिकृया: *
पठाउनुहोस