चैत १८,चितवन । भरतपुर महानगरपालिका वडा नम्बर ४ लंकु स्थित एक दालमोठ उत्पादन गर्ने उद्योगमा आगलागी हुंँदा रू.३ करोड बराबरको क्षति भएको छ ।
मंगलवार बिहान ६ बजे सारस फूड इन्डष्ट्रीमा आगलागी भएको हो ।
जिल्ला प्रहरी कार्यालय चितवनका अनुसार दालमोठ, पिनट, भूजिया उत्पादन गर्ने उक्त उद्योगमा लागेको आगो बिहान १० बजेमात्र नियन्त्रणमा आएको थियो ।
आगलागीबाट उक्त रकम बराबरको क्षति भएको प्रारमिम्भक अनुमान गरिएको छ ।
भरतपुर महानगरपालिकाका दुई, खैरहनी नगरपालिका र नेपाली सेनाको एक/ एक ओटा दमकल, प्रहरी, शशस्त्र प्रहरी, नेपाली सेना र स्थानीयको सहयोगमा आगो नियन्त्रणमा आएको जिल्ला प्रहरी प्रमुख नान्तीराज गुरुङले जानकारी दिए । बिद्युत् सर्किट चुहाबट भएर आगलागी भएको हुनसक्ने प्रहरीको अनुमान छ ।
उद्योगका सञ्चालक सुनील अग्रवालले आगलागीबाट सम्पूर्ण कच्चा पदार्थ, मेशीन जलेर नष्ट भएको बताए । उनका अनुसार लकडाउनको समयलाई लक्षित गरी भण्डारण गरिएको खानेतेल, घिउ, चिउरा लगायतका खाद्यवस्तु नष्ट भएका छन् ।
उद्योगमा रहेको प्लाण्ट मेशीन,पाहुँच मेशीन,डोमिनो रिमाइण्डर, प्रिन्टिङ, कन्भेयर मेशीनसमेत काम नलाग्ने भएको र रू.३ करोड बराबरको क्षति भएको उनले बताए । उक्त उद्योगमा १८ जना कर्मचारी, मजदूर कार्यरत छन् ।