पशुपन्छी औषधि व्यवसायी संघको महाधिवेशन चितवनमा हुँदै

अभियान संवाददाता

चितवन। नेपाल पशुपन्छी औषधि व्यवसायी संघको १४औं राष्ट्रिय महाधिवेशन तथा ३३औं वार्षिक साधारणसभा चितवनको भरतपुरमा हुने भएको छ । पुस २४ र २५ गते हुने कार्यक्रममा सात प्रदेश र २२ शाखाबाट महाधिवेशन प्रतिनिधि, कम्पनी प्रतिनिधि, परिवेक्षक, संघसंस्थाका प्रतिनिधि एवं नियमनकारी निकायका प्रतिनिधि सहभागी हुने बताइएको छ । 

संघमा हाल एक हजार ९२३ सदस्य आबद्ध छन् । महाधिवेशनले २१ सदस्यीय नयाँ कार्यसमिति चयन गर्ने बताइएको छ । समितिको कार्यकाल दुई वर्षको हुने प्रावधान छ । 

संघका महासचिव नारायणबहादुर भुजेलका अनुसार नेपालमा २० ओटा स्वदेशी कम्पनीले भेटेरिनरी औषधि, भ्याक्सिन र फिड सप्लिमेन्ट उत्पादन तथा विक्री वितरण गर्दै आएका छन् । त्यस्तै यो व्यवसायमा एक हजार ४०० पैठारीकर्ता रहेका छन् । औषधि, भ्याक्सिन र फिड सप्लिमेन्टको बजार वार्षिक १३ अर्ब रुपैयाँको रहेको उनको भनाइ छ । 

नेपालमा औषधि, भ्याक्सिन र फिड सप्लिमेन्टको बजार २० प्रतिशत आन्तरिक उत्पादन तथा ८० प्रतिशत आयातमा निर्भर रहेको बताइन्छ । तीन लाख जनशक्तिलाई रोजगार प्रदान गरेको यस क्षेत्रमा १ खर्ब ५० अर्ब रुपैयाँको लगानी रहेको संघले जानकारी दिएको छ ।

प्रतिक्रिया [0]