असार ३, चितवन । चितवनको इच्छाकामना गाउँपालिका वडा नम्बर ६ स्थित कालीखोलामा पहिरो खस्दा नारायणगढ मुग्लिन सडक खण्ड अबरुद्ध भएको छ ।
बुधवार बिहान सवा ४ बजे खसेको पहिरोको कारण दुवैतर्फी रुपमा सडक अवरुद्ध भएको जिल्ला प्रहरी कार्यालय चितवनले जानकारी दिएको छ । कार्यालयका प्रवक्ता सूर्य थापाले पहिरो ठूलै गएकोले हाल मुग्लिनबाट र नारायणगढबाट पठाइएको डोजरले पहिरो पन्छाउने काम भइरहेको बताए ।
उनका अनुसार शुरुमा पहिरो सानो गए पनि पछि ठूलो ढिस्का नै झरेकोले सडक खुल्न केही घण्टा लाग्नेछ । ‘शुरुमा खसेको पहिरो सानो थियो, पछि ठूलै ढिस्का खसेकोले सडक खुल्न २ देखि ४ घण्टा लाग्ला,’ थापाले भने ।
राति परेको अविरल वर्षाका कारण पहिरो गएको प्रहरीको भनाइ छ ।
सडक अवरुद्ध हुँदा मुग्लिनतर्फ गइरहेका सवारी साधन दासढुंगामा तथा उताबाट आइरहेका सवारी साधनहरु मुग्लिन बजारमा रोकिएको प्रहरीले बताएको छ ।