असार ३, चितवन । चितवनका सरकारी कार्यालयहरु औपचारिक रुपमा असार १ गतेदेखि खुलेपनि सेवाग्राहीको चाप न्यून भएको पाईएको छ । सरकारले झण्डै तीन महीनापछि आंशिक रुपमा लकडाउन खोलेपनि सेवाग्राहीको उल्खेनीय उपस्थिति नभएको हो ।
जिल्लाका बढी सेवाग्राहीको चाप हुने मालपोत, कार्यालय, यातायात सेवा व्यवस्था कार्यालय, विद्युत् कार्यालय, आन्तरिक राजस्व कार्यालयहरुमा सेवाग्राही अपेक्षित रुपमा नआएको कर्मचारीहरुले बताएका छन् ।
आन्तरिक राजस्व कार्यालयका सूचना अधिकारी कपिल नेपाल लामो समयपछि कार्यालय खुल्दा सेवाग्राहीको चाप बढ्ने अपेक्षा गरिएपनि त्यो नभएको बताउँछन् । ‘हामीले पहिलो दिन देखिनै सेवाग्राहीको चाप बढ्ने अपेक्षा गरेका थियौं’, उनले भने, ‘सोचेजस्तो सेवाग्राहीको चाप छैनन ।’
उनका अनुसार अझैपनि करदाता अन्यौलमा रहेको र जरिवाना नलाग्ने भएकोले अत्यावश्यक कामका बाहेक अन्य सेवाग्राही आएका छैनन् । सरकारले गरेको आंशिक लकडाउन, जोर–विजोर प्रणाली र सार्वजनिक यातायात नचलेका कारण पनि टाढाबाट आउने करदाता आउन नसकेको उनको भनाइ छ ।
सरकारले कोरोना सुरक्षा मापदण्ड र सामाजिक दुरी अपनाउन सरकारी कार्यालयहरुमा दुई चरणमा कार्यालय खोल्न निर्देशन दिएको छ । अझै पनि कयौं मानिस कोरोना भाइरसको जोखिम र त्रासका कारण बाहिर निस्किन सकेका छैनन् ।
यातायात व्यवस्था सेवा कार्यालय, चितवनका प्रमुख सुवास उप्रेती सबै खाले कर तिर्ने अन्तिम मिति चैत मसान्त भएपनि सेवाग्राहीको चाप नबढेको बताउँछन् ।
‘हामीले दुई सिफ्टमा सामाजिक दुरी अपनाएर सेवा दिएका छौं, उनले भने, ‘तर यति लामो समयपछि कार्यालय खोल्दा पनि चाप बढेको छैन, चारपांग्रे सवारीको तुलनामा दुईपांग्रे सवारीको राजस्व त बढेको छ तरपनि सरकारले चैतमा तिनुपर्ने राजस्व असारमसान्तसम्म तिर्न सकिने भनेकाले पनि चाप कम भएको हो ।’
राजस्व तिर्न आउँदा नियमित रुपमा कोरोना सुरक्षा मापदण्ड अपनाईएको र सामाजिक दुरी कायम गरी राजस्व तिर्ने व्यवस्था गरिएकोले सेवाप्रवाहसमेत सुस्त भएको उनले बताए ।
सधैंजसो भीड हुने जिल्लाको भरतपुर मालपोत कार्यालयमा समेत सेवाग्राहीको त्यति चाप देखिएको छैन ।
कोरोनाका कारण आर्थिक क्षेत्र तहसनहस भएसँगै घरजग्गा कारोबारमा समेत कमी आएको छ । मालपोत कार्यालयमा विदेश जाने विद्यार्थीको लागि धितो बैंक ऋणको प्रक्रिया र जग्गा रोक्काको कामसमेत ठप्प भएकाले पनि सेवाग्राही कम देखिएका हुन् ।
शुरुका दिनदेखिनै सेवा नियमित गरेपनि अत्याश्यक काम अंशवण्डा र न्यून मात्रामा पहिले पेन्डिङ रहेका जग्गा पासको कामका लागि मात्र सेवाग्राही आउने गरेको मालपोत अधिकृत हेम तिमिल्सिना बताउँछन् ।
‘चाप त निकै कम छ’, उनले भने, ‘हामीले स्वास्थ्य सुरक्षाको लागि टोकन प्रणाली लागू गरेका छौं ।’ उनका अनुसार कार्यालयमा आउने सेवाग्राहीलाई एकदिनमै हुने कामलाई सोही दिन सकेर पठाइने गरेको र लामो समय लाग्ने कामलाई दिन तोकेर पठाउने गरिएको छ ।
कार्यालय कक्षभित्र फाइल ल्याउने लैजाने गर्ने काम स्वयं कर्मचारीले नै गर्ने र पालोमा सेवाग्राहीलाई राख्ने गरिएको छ । अधिकांश सरकारी कार्यालयले इन्फारेड गनले ज्वरो नाप्ने, कार्यालय परिसर भित्र हात धुने, सेनिटाइजिङ र अनिवार्य मास्क प्रयोगमा कडाई गरेका छन् ।