जिल्ला प्रहरी कार्यालय चितवनमा ६६ ओटा चेक अनादरका मुद्धा दर्ता 

सूर्यप्रसाद अधिकारी

असार ११, चितवन । आर्थिक वर्ष ०७६/७७ मा जिल्ला प्रहरी कार्यालय, चितवनमा ६६ ओटा चेक अनादरका मुद्धा दर्ता भएका छन् । कार्यालयका अनुसार तीमध्ये ६४ ओटा मुद्धा फर्छ्योट भइसकेका छन् भने २ ओटा फर्छ्योट हुन बाँकी छ । 

चेक अनादरका रकम न्यूनतम ५० हजार देखि ५ करोड सम्मको दर्ता भएको प्रहरी कार्यालयका प्रमुख नान्तीराज गुरुङले जानकारी दिए । उनका अनुसार पीडितले बैंकिङ कसुर अन्तर्गत जाहेरी दिइसकेपछि हेटौंडाको उच्च अदालतमा मुद्धा प्रक्रिया अगाडि बढ्छ । 

गत वर्षको तुलनामा यसवर्ष चेक अनादरको घटना खासै बढेको छैन । गत आर्थिक वर्षमा ६२ ओटा चेक अनादरको जाहेरी परेकोमा ६२ ओटा नै फर्छ्योट भइसकेको छ । लकडाउन अघि चेक अनादरका जाहेरी दिनहुँ जसो आउने गरेपनि लकडाउन शुरुभए यता जाहेरी नलिएको गुरुङले जानकारी दिए । चेक अनादरका मुद्धाहरुमा अधिकांश जग्गा व्यवसायी, मेनपावरका व्यवसायी रहेका छन् । 

गुरुङका अनुसार क्षणिक समस्या समाधान गर्न र झन्झटबाट उम्किन त्यस्ता व्यवसायीले पीडितलाई चेक दिएर सम्पर्क बिहीन भएको उनले बताए । ‘जाहेरी दिन्छन, मुद्धा दर्ता गर्न उच्च अदालतमा लैजाने बेला जाहेरीवाला समेत सम्पर्कबिहीन हुन्छन् ।’ उनले भने । 

कोभिड १९ का कारण लकडाउनपछि कार्यालयले कुनैपनि चेक अनादरको जाहेरी नलिएको र त्यस्ता पीडित व्यक्तिलाई सिधै उच्च अदालत जान आग्रह गरेको उनले बताए । 

चेक अनादरका घटना लकडाउन अघि प्रहरी कार्यालयमा आउने गरेपनि लकडाउनका यस्ता घटनाको दर्ता बन्द गरेको अधिवक्ता विनोद मिश्रे बताए । उनका अनुसार चेक मुद्धा दर्ता भइसेकपछि पीडकले विगो बराबरको जरीवाना समेत तिर्नुपर्ने हुन्छ । 

जसमध्ये आधा रकम सरकारी राजस्वमा जम्मा हुने गर्दछ । ‘पीडितले यस्तो केसमा कि प्रहरीसमक्ष जाहेरी दिएर कानूनी प्रक्रिया अघि बढाउन सक्छन्, कि सिधै उच्च अदालतमा मुद्धा पेश गर्न सक्छन् ।’ उनले भने ‘मुद्धा र घटनाको प्रकृति हेरी जरीवानासँगै ३ महीनासम्म कैद सजाय हुन सक्ने अधिवक्ता मिश्रले बताए । 

प्रतिक्रिया [1]

---

पुरा नाम: *

इमेल: *

प्रतिकृया: *
पठाउनुहोस