१ अर्ब लगानीमा अत्याधुनिक प्रविधिको कागज उद्योग सञ्चालनमा   

सूर्यप्रसाद अधिकारी

साउन २८, चितवन । नवलपरासी (बर्दघाट–सुस्तापूर्व) जिल्लाको मध्यविन्दु नगरपालिका वडा नम्बर १० स्थित  अरुणखोलामा रू.१ अर्ब लगानीमा अत्याधुनिक प्रविधिसहितको कागज उद्योग सञ्चालनमा आएको छ ।

 चितवनका तीन जना उद्योगी र काठमाडौंका एक उद्योगीको संयुक्त लगानीमा क्वालिटी पेपर उद्योग सञ्चालनमा आएको हो  । उद्योगको पूर्वाधार निर्माणको काम विसं २०७५ सालमा शुरु भएपनि उत्पादन शुरुगर्ने गरी हालै सञ्चालनमा ल्याइएको छ ।

भरतपुर महानगरपालिका–३, बेलचोकमा मुख्य कार्यालय रहेको कागज उद्योगले बुधबार भरतपुरमा पत्रकार सम्मेलन गरी उद्योगबारे जानकारी गराएको हो  । पत्रकार सम्मेलनमा बोल्दै उद्योगका प्रबन्ध निर्देशक राजन पियाले भारत, चीन र स्वीडेनबाट ल्याइएका अत्याधुनिक उपकरण जडान गरी पुराना कागजलाई प्रशोधन गरी  प्याकेजिङमा प्रयोग हुने नयाँ कागज (क्राफ्ट पेपर) उत्पादन गरिएको  जानकारी दिए ।

‘हामीले अहिले ठूला– ठूला उद्योगको लागि चाहिने प्याकेजिङ ब्राउन कागज उत्पादन गर्दैछौं’, उनले भने, ‘अहिले उत्पादनको परीक्षण गरिएको छ । एकसाताभित्र बजारमा लग्नेछौं ।’ 
उनका अनुसार हाल प्याकेजिङ पेपर उत्पादन गरिएपनि निकट भविष्यमा सेतो कागज र प्रिन्टिङ कागज पनि उत्पादन गरिनेछ ।

हाल ६० प्रतिशत प्याकेजिङ कागज भारतबाट ल्याउनु परेको भन्दै उनले आयात प्रतिस्थापनको लागि यस उद्योगले टेवा पुर्‍याउने पनि बताए । ‘अहिलेको समयमा पनि मासिक १ हजार टन प्याकेजिङ पेपर आयात हुन्छ, हाम्रो उद्योगको दैनिक उत्पादन क्षमता १२० टन छ’, उनले भने । 

कम्पनीका बजार निर्देशक रुपक श्रेष्ठले नेपालमा खेर जाने पत्रु कागजको पुनः प्रशोधन गरी प्रयोगमा ल्याउन र नेपालका उद्योगी व्यवसायीलाई आयात गर्नुपर्ने बाध्यताबाट हटाउन उद्योगले मद्धत पुग्ने बताए । ‘भारतबाट कागज मगाउन एकैपटक धेरै अर्डर गर्नुपर्ने हुन्छ’, उनले भने, ‘हामीले खुद्रा तथा होम डेलिभरी गर्ने गरी सुविधा दिनेछौं ।’ 

उनका अनुसार नेपालमा पत्रु कागज सस्तो मूल्यमा विदेश निर्यात हुने गरेको र विदेशबाट क्राफ्ट पेपर पुन महंगो मूल्यमा  स्वदेश आयात हुने गरेकोले उद्योगको उत्पादनसँगै केही हदसम्म यहाँका उद्योग व्यवसायीलाई राहत पुग्ने छ । बजार निर्देशक श्रेष्ठले क्राफ्ट पेपरबाहेक उक्त उद्योगबाट चार महीनापछि सेतो कागज र न्यूजप्रिन्ट दैनिक ७० टन उत्पादन गर्ने लक्ष्य लिइएको जानकारी दिए  ।

अहिलेलाई माग अनुसार रोल र सिट दुवै खाले क्राफ्ट पेपर उत्पादन शुरु गरिएको छ । ‘उद्योग सञ्चालनमा आएपछि अब पत्रु कागज निर्यात र क्राफ्ट पेपरको आयात केही हदसम्म कम हुन्छ’ उनले भने । हाल उद्योगले १५० जनालाई रोजगारी दिएको बताएको  छ ।योसँगै नेपालमा क्राफ्ट पेपर उत्पादन गर्ने पाँच ओटा पुगेका छन् ।

तीमध्ये भैरहवामा रहेको एउटा कागज उद्योग हाल बन्द अवस्थामा छ । विराटनगरमा दुई र वीरगञ्जमा एक ओटा उद्योग सञ्चालनमा सो अवसरमा जानकारी दिइयो ।

प्रतिक्रिया [0]

पुरा नाम: *

इमेल: *

प्रतिकृया: *
पठाउनुहोस