लोकतन्त्रको बलियो आधार भ्रष्टाचार

मदन लम्साल

दुनियाँभरिको भ्रष्टाचारीमाथि आँखा लगाएर बस्ने संस्था ट्रान्सपरेन्सी इन्टरनेशनलका अनुसार भ्रष्टाचारमा नेपालको स्थान प्रत्येक वर्ष बढ्दै गइरहेको छ । यसको मतलब अब देशमा भ्रष्टाचार भन्ने रोगबाट कोही अछुतो नरहने भए । भ्रष्टाचारको रकम पनि हजारबाट लाख, लाखबाट करोड र अहिले अर्बौं पुगिसक्यो । यसलाई यसरी पनि बुझौं कि भ्रष्टाचार बढ्यो भन्नुको मतलब हाम्रो विकासको गति पनि आकाशिँदै छ ।

तर, प्रश्न यो छ कि के भएर भ्रष्टाचार हुने हो ? शहर गाउँका सडकमा धूलो उड्यो भने भ्रष्टाचार हुने हो ? मेलम्ची नआएर भ्रष्टाचार भएको हो कि, सरकारले सवारीमा २०० प्रतिशत कर लिएकाले भ्रष्टाचार भयो भनिएको हो ?

वास्तवमा भ्रष्टाचार त लक्ष्मीको वाहन हो । त्यही चढेर त लक्ष्मी घरघर आउँछिन्, आइरहेकी छिन् । यसैको सहारामा त पखेटाविहीन देशको लोकतन्त्र आकाशमा उडिरहेको छ ।

सडकमा फोहोर नउठेर भ्रष्टाचार भएको पो हो कि ? किसानले मल नपाएकाले भ्रष्टाचार भएको हो ? तरकारी आयात गरेर खाएकोले भ्रष्टाचार भएको हो कि महँगी बढेकाले ?

यो पंक्तिकारको विचारमा यी सब बेकारका कुरा हुन् । यो त सरकारलाई बदनाम गर्ने कुरा मात्र हुन् । र मानिसले कुरै नबुझी गरेका कुरा हुन् । त्यसैले त यो ट्रान्सपरेन्सी हो कि भ्रमपरेन्सी हो, त्यसको प्रतिवेदन नै सरकारले खारेज गर्दियो । लौजा !

केही उपबुज्रुकहरू कुरै नबुझी भन्छन् कि देशको आर्थिक स्थिति सुधार्ने हो भने भ्रष्टाचारमा अंकुश लगाउनुपर्छ रे । भ्रष्टाचारीलाई कारबाही गर्नुपर्छ रे । साक्षरता बढाउनुपर्छ रे । यो त सीधै हाम्रो देशको लोकतन्त्र सिध्याउने कुरा हो । यो झेल हो । यो पक्कै कुनै विदेशी शक्तिको खेल हो ।

वास्तवमा भ्रष्टाचार त लक्ष्मीको वाहन हो । त्यही चढेर त लक्ष्मी घरघर आउँछिन्, आइरहेकी छिन् । यसैको सहारामा त पखेटाविहीन देशको लोकतन्त्र आकाशमा उडिरहेको छ । भ्रष्टाचार समाप्त गर्ने सुझाव दिनेहरू किन यो बिचरा लोकतन्त्रलाई धराशयी पार्न लागिपरेका होलान् कुन्नि ?

यो नसोध्नुहोस् कि भ्रष्टाचारको लोकतन्त्रसँग के सम्बन्ध छ र भनेर ? छ नि, गहिरो सम्बन्ध छ । भ्रष्टाचार समाप्त भयो भने चुनावका लागि पैसा कहाँबाट आउँछ ? सुको पैसा भएन भने चुनाव कसरी लडिन्छ ? जब चुनाव गराउनकै लागि खल्ती खाली हुन्छ अनि लोकतन्त्र जीवित चैं रहन्छ कसरी ?

भ्रष्टाचारमाथि अंकुश लगाएपछि देशको आर्थिक स्थिति स्वाट्टै खस्किन्न र ? खस्किहाल्छ नि । अनि आफै टाट पल्टेका टकनटाट नेताहरूले देश र जनताका बारेमा कसरी सोच्न पाउँछन् ? जनताले त ल जसोतसो गरीबी झेल्लान् । तर तिनका नेता सुकुमबासी नै रहिरहे भने उनीहरू त्यो कसरी सहन सक्छन् र ? वास्तवमा नेताहरूको सुखमै त जनताको पनि भविष्य सुखी रहन्छ । नेता सुखी भए पो देश पनि समृद्ध हुन्छ त !

ल एक छिनलाई नेताहरूलाई भाडमै जान दिम् । तर सोचौं कि भ्रष्टाचार भएन भने सरकारी हाकिमहरूको के हालत हुन्छ होला ? किनकि देशको गाडा त यिनीहरूले नै हाँकिरहेका छन् । अनि गाडी गाडा चलाउनेहरूका पेटमा नै मुसाहरूले कीर्तन गर्न थाले भने सरकारको गाडी हाँक्ने कष्ट चैं कसले उठाउँछ फेरि ? एकछिन सोच्नुस् त !  गाडावाला चैं भोको रह्यो भने र गोरु नै बाटोमा बस्यो भने लोकतन्त्रको गाडा कसको सहारामा हिँड्ला ?

मानिसहरू नेताहरूलाई भ्रष्टाचार गरेको त्यसै आरोप लगाउँछन् । त्यो पैसा त चुनावमा जनतालाई बाँड्ने गरकै छ नि ! जनतालाई पैसा घुमाएर बाँड्नुभन्दा चुनावको मौकामा सीधै बाँडेको त हो नी । संसारमा यस्तो राजनीति कतै देख्नुभएको छ ? त्यही भएर त विश्वमा हराउँदै गएको समाजवाद र साम्यवाद सबै नेपालमा जोगिएको छ ।

ए हजुर, भ्रष्टाचार त हात्ती हो हात्ती । राष्ट्र बैंकले निकाल्ने नोटमा भएको हात्ती । उसैको खुट्टामुनि त सबैका खुट्टी छन् । उसकै खुट्टामै यो देशको सम्पूर्ण अर्थतन्त्र अडेको छ । यो त त्यो हात्ती हो, जसमाथि बसेर नै यो देशका नेता तीर्थयात्रामा निस्कन्छन् र फर्कन्छन् पनि उसकै पिठ्युँमा बसेर । त्यसैले देशका कर्णधारहरूलाई पैदल नहिँडाऔं ।

लोकतन्त्रलाई जीवितै राखिरहने हो भने भ्रष्टाचारको यो हात्तीलाई बरु निरंकुश नै रहन दिऊँ । दुई चार कुकुर भुक्दै गर्छन्, त्यसले हात्तीलाई के नै फरक पार्छ र ?

हेर्नुस्, सरस्वती र लक्ष्मीबीच जन्मौंजन्मदेखि नै वैरता छ । जहाँ सरस्वती हुन्छिन्, त्यहाँ लक्ष्मी गायव हुन्छिन् । तर देशको आर्थिक स्थिति सुधार्नका लागि सरस्वती होइन, लक्ष्मीकै आवश्यकता हुन्छ । त्यसैले त महीनौं पठनपाठन बन्द भए पनि त्यसलाई अघि बढाउन सरकारले चासो नदिएको !

सरस्वती नभएपछि लक्ष्मी त आफै आइहाल्छिन् नि । जसै अफिस अफिसमा हरियो नोटको गर्मी बढ्न थाल्छ, तसै तसै कामको गति पनि तेज कुद्न थाल्दछ । नोटका गर्मीको प्रकोपबाट मै हुँ भन्नेहरूको पनि इमान जमान पग्लिन थाल्छ र आर्थिक प्रगति माथि माथि उक्लिन थाल्छ । त्यसैले सबैलाई साक्षर बनाउने वा चेतनशील बनाउने कुरा नै पूर्णरूपमा राष्ट्रविरोधी हो, समृद्धिको शत्रु हो  ।

लक्ष्मीलाई पाउने हो भने उनको वाहनलाई पनि हेरचाह गर्नैपर्छ । लक्ष्मीको वाहन को हो, सबै नेपालीलाई थाहै छ । यो देशमा सबै पढे लेखेर जान्ने बुझ्ने विद्वान् भए, धनी भए भने घरघर माथि छाना कसले उठाउँछ ? निरक्षरहरूले नै त लोकतन्त्रको छानालाई थामिरहेका छन् ।

त्यसैले, देशका हे बुद्धिजीवीहरू ! हे अर्थशास्त्रीहरू हो ! ल है, अहिले भ्रष्टाचार र भ्रष्टाचारीका विषयमा चिन्ता गर्ने समय हैन, अहिले त जसरी भए’नि देशको लोकतन्त्र चैं जीवित राख्नैपर्छ है ! त्यसैले भ्रष्टाचार फाल्ने होइन, यसलाई पाल्नैपर्छ । भ्रष्टाचार जोगाएरै लोकतन्त्रलाई बलियो बनाउनेतिरको महान् यात्रामा सबै दल अझै जुट्नुपर्छ है !

प्रतिक्रिया [0]