यातायात व्यवस्था सेवा कार्यालय चितवनको राजस्वमा साढे २७ प्रतिशत वृद्धि

सूर्यप्रसाद अधिकारी

माघ १०, चितवन । यातायात व्यवस्था सेवा कार्यालय, चितवनको राजस्व संकलनमा साढे २७ प्रतिशतले वृद्धि भएको छ । गत आर्थिक वर्षको पुष महिनासम्मको तुलनामा चालु आर्थिक वर्ष सोही अवधिमा कार्यालयको राजस्व २७ दशमलव ४७ प्रतिशतले बढेको हो । 

कार्यालयका अनुसार गत वर्षको पुष मसान्तमा कार्यालयले २६ करोड ७२ लाख ११ हजार ७ सय ६९ रुपैयाँ राजस्व संकलन गरेको थियो भने चालू आर्थिक वर्षको पुष मसान्तसम्म ३४ करोड ६ लाख २७ हजार ४सय ३६ रुपैयाँ राजस्व संकलन भएको छ । 

कार्यालयका प्रमुख सुवास उप्रेतीले सवारीको संख्या र राजस्वको दर केही मात्रमा बढेकोले पनि राजस्व गतवर्षको तुलनामा वृद्धि भएको बताए । ‘वर्षेनि सवारीको संख्या पनि पनि बढेको छ,’ उनले भने, ‘वाग्मती सरकारले सवारी साधनले राजस्व दरमा  केही वृद्धि पनि गरेको छ ।’

कतिपय सवारीसाधन धनीले समयमै राजस्व नबुझाएका कारण जरीवाना बाट पनि राजस्व संकलनमा वृद्धि हुने उनको भनाइ छ ।

सबैभन्दा बढी राजस्व संकलन असोजमा 

चालू आर्थिक वर्षको पुष मसान्तसम्ममा कार्यालयले सबैभन्दा बढी राजस्व असोजमा (७ करोड १३ लाख ३९ हजार ४ सय ९२ रुपैयाँ) संकलन गरेको छ । यस्तै भदौमा सबैभन्दा कम २ करोड २४ लाख ४ हजार ७७ रुपैयाँ संकलन गरेको छ । कोभिडका कारण गरिएको निषेधाज्ञाका कारण भदौमा सबैभन्दा कम र असोजबाट बन्दाबन्दी खुकुलो हुँदै गएपछि कम र बढी राजस्व संकलन भएको उप्रेतीले बताए । 

यसैगरी कार्यालयले साउनमा ६ करोड १७ लाख २४ हजार ७१६, कात्तिकमा ५ करोड ९८ लाख ३३ हजार ५९३, मंसिरमा ६ करोड ३१ लाख २० हजार ८९० र पुसमा ६ करोड २२ लाख ४ हजार ६६८ राजस्व संकलन गरेको छ । गत आवको असार मसान्तसम्म कार्यालयले ४६ करोड ५३ लाख ६९ हजार २०६ रुपैयांँ राजस्व संकलन गरेको थियो । 

कार्यालयले चालू आर्थिक वर्षमा ५५ करोड रुपैयाँ राजस्व संकलन हुने प्रक्षेपण गरेको छ । कार्यालयमा यातायात क्षेत्रको आम्दानी, सवारीसाधन कर, सवारी दस्तुर र प्रशासनिक दण्ड जरीवानाबाट राजस्व संकलन हुने गर्दछ । 
 

प्रतिक्रिया [0]

पुरा नाम: *

इमेल: *

प्रतिकृया: *
पठाउनुहोस