चितवन । चितवन उद्योग संघले भविष्यमा आइपर्ने जोखिम र विपद्का लागि औद्योगिक राहत कोष स्थापना गरेको छ । उद्योगमा आइपर्ने प्राकृतिक विपत्ति तथा अन्य क्षतिलाई तत्काल सम्बोधन गर्ने उद्देश्यले राहत कोष स्थापना गरिएको हो ।
हाल राहत कोषमा २० लाख रुपैयाँ जम्मा भइसकेको छ भने अन्य रकम आउने क्रम जारी रहेको संघले बताएको छ । हालै मात्र स्थापना गरी कार्यान्वयन प्रक्रिया अघि बढेको राहत कोषमा संघका अध्यक्षले १ लाख रुपैयाँ निक्षेप गरेर राहत सीड मनी सुरु गरे ।
उनका अनुसार उद्योगीले आफूले जम्मा गरेको रकमको सय गुणा बढी रकम तत्काल राहतका लागि पाउनेछन् । ‘हामीले राहत कोषका लागि उद्योगीलाई रकम जम्मा गरेको आधारमा एक सय गुणा राहत उपलब्ध गराउनेछौं,’ उनले भने, ‘जुन रकम उद्योगीले बीमा रकम भुक्तानी नभइन्जेल ६ महिनाभित्र बुझाउनुपर्नेछ ।’
राहत कोष स्थापना गर्दा उद्योगको दैनिक काम–कारबाही नरोकिने र बिनाब्याज रकम उपयोग गर्न सकिनेछ ।
भूकम्प, आगलागी, चोरी, बाढीपहिरोजस्ता विपद्ले उद्योग पूर्ण रूपमा क्षति भई पुनः सञ्चालन गर्न सहयोग उपलब्ध गराइनेछ । सहयोग रकम अधिकतम ५० लाखसम्म उपलब्ध हुनेछ ।
संघको चितवन औद्योगिक विकास बचत तथा ऋण सहकारीमा रकम जम्मा गर्ने प्रबन्ध मिलाइएको संघका वरिष्ठ उपाध्यक्ष त्रिलोचन कँडेलले जानकारी दिए । उनका अनुसार हाल सघमा आबद्ध १ हजार २ सय उद्योगमध्ये पहिलो चरणमा २ सय उद्योगले राहत कोषमा रकम जम्मा गर्न लागेका छन् ।
यो अभियानलाई स्थानीय पालिकाले पनि सहयोग गरिरहेका छन् । कालिका र खैरहनी नगरपालिकासँग ५/५ लाखको सम्झौता भइसकेको छ भने अन्य पालिकामा सम्झौताको चरणमा रहेको कँडेलले बताए ।
जिल्लामा विपद्का कारण बर्सेनि उद्योगमा क्षति हुने गरेको र कतिपय उद्योग तत्काल पुँजी अभावमा सञ्चालन गर्न नसकेर बन्द भएका कारण राहत कोष स्थापना गरिएको संघका कार्यकारी निर्देशक गणेशप्रसाद सिलवालले जानकारी दिए ।