यात्रुको ‘मुभमेन्ट’ बढेपछि जहाज थप्दै वायुसेवा कम्पनी, तीन कम्पनीले तत्कालै नयाँ जहाज ल्याउने

हिमा वि.क.

साउन २२, काठमाडौं । कोभिडपछि हवाई उडानमा यात्रुको ‘मुभमेन्ट’ बढेसँगै सरकारी र निजीक्षेत्रका वायुसेवा कम्पनीहरूले जहाज थप्ने योजना अघि सारेका छन् । आन्तरिक हवाई सेवामा वर्चस्व राख्दै आएका निजी क्षेत्रका एयरलाइन्ससहित सरकारी वायुसेवा निगमले पनि जहाज थप्ने योजना अघि सारेका हुन् ।

निजी क्षेत्रबाट बुद्ध एयर र यती एयरलाइन्सले जहाज थप्न लागेका छन् । अन्य कम्पनी भने तत्काल जहाज नथप्ने मनस्थितिमा छन् । सरकारी स्वामित्वको नेपाल वायुसेवा निगमले भने आन्तरिकतर्फ दुर्गम (स्टल) र सुगम (ट्रंक) दुवै रूटमा जहाज थप्ने योजना अघि सारेको छ ।

मासिक अधिकतम ४ हजार पटकसम्म उडान/अवतरण गरेको बुद्ध एयरले आगामी अक्टोबरसम्ममा थप १/२ थान जहाज ल्याउने तयारी गरेको छ । कम्पनीका प्रबन्ध निर्देशक (एमडी) वीरेन्द्रबहादुर बस्नेतले ५ जहाज ल्याउने योजना सुनाए । त्यसमध्ये पहिलो चरणमा अक्टोबरसम्ममा १/२ थान आइपुग्नेछ । कम्पनीले एटीआर–७२ सिरिजका जहाज ल्याउँदै छ । बुद्धले अहिले प्रदेशलाई पनि हब बनाएर उडान शुरू गरेको र मर्मतसम्भार गर्दा जहाज अपुग हुने समस्या नआओस् भनेर थप्न लागेको हो ।

कोरोना संक्रमणमा केही महीना ठप्प भएको उडान क्षेत्र अहिले लयमा फर्किएको छ, जसले गर्दा जहाज उडान/अवतरणमा उल्लेख्य सुधार आएको छ । बुद्ध एयरले सन् २०२२ को जनवरीमा मात्रै न्यूनतम ३ हजार २५२ पटक उडान अवतरण गरेको छ । 

बुद्धले सबैभन्दा धेरैपटक (४ हजार २०६ पटक) उडान/अवतरण भने मार्चमा गरेको छ । त्रिभुवन अन्तरराष्ट्रिय विमानस्थल कार्यालय (टीआईए)को तथ्यांकअनुसार मार्चमा २ लाख ३३ हजार ९६० यात्रुले बुद्ध एयरबाट यात्रा गरेका छन् ।

दोस्रो स्थानमा रहेको यती एयरलाइन्सले पनि तीनओटा जहाज थप्दै छ । तीमध्ये पहिलो जहाज अगस्त अन्तिमसम्ममा आइपुग्छ । एटीआर–७२ सिरिजको जहाज ल्याउने कम्पनीका प्रवक्ता सुदर्शन बर्तौलाले जानकारी दिए । 

यससँगै सन् २०२२ भित्रै यतीले दुईओटा जहाज ल्याउने उनको भनाइ छ । तेस्रो जहाज ल्याउने विषयमा पनि कुरा भइरहेको बर्तौलाले बताए । ‘अहिले अकुपेन्सी ७० प्रतिशत छ,’ उनले भने, ‘अफ सिजनका कारण अहिले बिजनेश कम छ ।’ टीआईएका अनुसार यतीको मासिक उडान संख्या न्यूनतम (फेब्रुअरीमा) १ हजार २५५ देखि अधिकतम (मेमा) १ हजार ५२२ पटक छ । यतीले सबैभन्दा धेरै मार्चमा ८९ हजार ४५९ यात्रुलाई सेवा दिएको छ ।

८ वर्षपछि पुरानै ब्रान्डमा फर्किएको निजीक्षेत्रको गुण एयरलाइन्सले भने तत्काल जहाज थप्ने योजना बनाएको छैन । श्री एयरलाइन्सले पनि अवस्था हेरेर मात्रै जहाज थप्ने तर तत्काल ल्याउने योजना नबनाएको प्रतिक्रिया दिएको छ । गुण एयरलाइन्सका प्रमुख कार्यकारी अधिकृत (सीईओ) बीके श्रेष्ठले सन् २०२३/२४ तिर मात्रै थप जहाज ल्याउने योजना रहेको बताए । 

अहिले सातओटा जहाजमार्फत सेवा दिएको गुणको बजार अंश पनि सकारात्मक नै देखिन्छ । उक्त कम्पनीले जनवरीमा मात्रै ६९४ पटक उडान/अवतरण गरेको छ । यस्तै श्री एयरलाइन्सको उडान/अवतरण सबै भन्दा धेरै मार्चमा देखिन्छ । मार्चमा श्रीले १ हजार ४६ पटक उडान/अवतरण गरेको छ । सरकारी स्वामित्वको नेपाल एयरलाइन्स (एनएसी) ले भने अप्रिलमा सर्वाधिक उडान/अवतरण गरेको छ । उक्त महीनामा एनएसीका जहाजले १ हजार ११३ पटक उडान/अवतरण गरेका छन् । 

केही समयअघि नेपाल वायुसेवा निगमले जारी गरेको एक प्रतिवेदनअनुसार सन् २०२२ मा आन्तरिकतर्फ स्टल र ट्रंक रूटमा ५ थान जहाज थप्ने योजना छ । त्यसका लागि २ अर्ब रुपैयाँ लगानी आवश्यक पर्ने उल्लेख छ । १० वर्षे व्यावसायिक योजनाअनुसार सन् २०२३ मा आन्तरिकतर्फ २ थान स्टल र २ थान ट्रंक रूटका लागि जहाज थप्ने उल्लेख गरिएको छ ।

प्रतिक्रिया [0]