इण्टरनेट सीआईएको परियोजना १

Apr 27, 2014

र यो पनि

रुसी राष्ट्रपति भ्लादमिर पुटिनले विश्व वेब सञ्जाल अमेरिकी गुप्तचर संस्था सेण्ट्रल इण्टेलिजेन्स एजेन्सी (सीआईए)को परियोजना भएको दाबी गरेका छन् । यसका साथै उनले सर्च इञ्जिन गूगल तथा इण्टरनेट प्रयोग गर्दा सावधानी अपनाउनसमेत रुसी नागरिकलाई सावधान गराएका छन् । युक्रेनमा तनाव बढिरहँदा रुस र अमेरिका नेतृत्वको पश्चिमा राष्ट्रबीच वाक्युद्ध चर्किंदै गर्दा पुटिनले यस्तो दाबी गरेका हुन् ।

बिहीवार रुसी युवा पत्रकारहरूसमक्ष बोल्दै पुटिनले इण्टरनेटको शुरुआत भएदेखि नै यो सीआईएको नियन्त्रणमा रहेको र यसमार्फत अमेरिकाले जासूसी गर्दै आएको बताए । ‘सीआईएको एक विशिष्ट परियोजनाअन्तर्गत इण्टरनेटको जन्म भएको हो,’ उनले भने । त्यस्तै इण्टरनेटले प्रदान गर्ने सूचना अमेरिकी राज्यमा रहेका सर्भरमा जाँच भएर मात्र खोजकर्तामाझ आइपुग्ने पुटिनको जिकीर छ । यसैक्रममा उनले रुसको सबैभन्दा लोकप्रिय सर्च इञ्जिन यानडेक्समाथि पनि नियन्त्रण गरिनसक्ने सङ्केत दिए ।

‘यानडेक्स आंशिक रूपमा विदेशमा दर्ता गरिनु कर सम्बन्धित कारणले मात्रै होइन, यसका पछाडि अन्य उद्देश्य पनि रहेका छन्,’ पुटिनले भने । उक्त सर्च इञ्जिनमा विदेशीहरूको आंशिक लगानी भएको उनले बताए । रुसको इण्टरनेट नियन्त्रण गर्ने विदेशीहरूको उद्देश्यबारेको पुरानो चिन्तालाई उनले दाहोर्‍याए । रासस/एएफपी