ललितपुरको ठेचोको स्ट्रबेरी फार्म, जहाँ पाइन्छ अर्गानिक स्ट्रबेरी अनि शान्त वातावरणको आनन्द

२०७९ माघ, २९

विविध फोटो फिचर

सुनिल शर्मा

काठमाडौं । गत शनिबार ललितपुरको ठेचोस्थित एग्रो स्टुडियोमा रहेको स्ट्रबेरी फार्ममा परिवारसहित पुगेकी थिइन् काठमाडौंकी अर्चना श्रेष्ठ । स्ट्रबेरी किन्न त्यहाँ पुगेकी उनी आफै स्ट्रबेरी टिप्दै थिइन् ।

अर्गानिक र ताजा स्ट्रबेरी पाइने सुनेर आफूहरू त्यहाँ पुगेको उनले सुनाइन् । सो फार्ममा स्ट्रबेरी प्रतिकेजी १ हजार २०० रुपैयाँमा पाइने गरेको छ । बजारमा भने प्रतिकेजी ५०० देखि ८०० रुपैयाँमा स्ट्रबेरी किन्न सकिन्छ ।

‘बजारको तुलनामा यहाँ महँगो त छ । तर, यहाँ अर्गानिक र ताजा पाइन्छ,’ स्ट्रबेरीको मूल्यबारे उनले भनिन् ।

श्रेष्ठको परिवार मात्रै होइन, काठमाडौंकै राजन धमलाको परिवार पनि शनिबार फार्ममै देखिन्थ्यो । उनको परिवारका केही सदस्य पनि स्ट्रबेरी टिप्दै गरेका देखिन्थे । शान्त वातावरणमा परिवारसँग केही क्षण बिताउन आएको धमलाले बताए ।

यी त प्रतिनिधि पात्र मात्रै हुन्, अहिले त्यहाँ स्ट्रबेरी किन्न आउनेहरू बढेका छन् । फार्मका कार्यकारी सञ्चालक तथा कृषक अन्वेष केसी स्ट्रबेरी किन्न आउनेहरू फार्ममै पुग्ने गरेको बताउँछन् । यहाँ स्ट्रबेरी आफै टिपेर किन्न पाइन्छ ।

यो ठाउँ संघीय राजधानी काठमाडौंबाट करिब १५ किमीको दूरीमा छ । शान्त वातावरणमा परिवार तथा साथीभाइहरूसँग रमाउन पनि यो ठाउँ उपयुक्त छ ।

करिब ६० रोपनी जग्गामा फैलिएको उक्त फार्ममा स्ट्रबेरी खेतीसँगै बाख्रापालन, माछापालन, टर्कीपालन आदि पनि गरिएको छ । यससँगै कुरिलो, सागसब्जीलगायत खेती पनि गरिएको फार्म सञ्चालक केसी बताउँछन् । करिब ९ महीनाअघि सञ्चालनमा आएको उक्त फार्म कृषिको अध्ययन, अनुसन्धान गर्न पनि महत्वपूर्ण भूमिका खेलेको उनको भनाइ छ ।

स्ट्रबेरी खेती भदौदेखि चैत महिनासम्म हुने गरेको छ ।

उक्त फार्ममा प्रवेश शुल्क ३०० रुपैयाँ तोकिएको छ । स्थानीयका लागि आइतवारदेखि शुक्रवारसम्म १०० रुपैयाँ प्रवेश शुल्क लाग्ने गरेको छ । तर, ५ जनाले ५००० रुपैयाँ बराबर स्ट्रबेरी खरिद गर्दा प्रवेश निःशुल्क छ ।