नबिलको ‘हरितगृह ग्यास उत्सर्जन’ प्रतिवेदन सार्वजनिक

अभियान संवाददाता

काठमाडौं । नबिल बैंकले सन् २०२२ को हरितगृह ग्यास उत्सर्जन प्रतिवेदन सार्वजनिक गरेको छ । बैंकले पूर्वाधार तथा परियोजना वित्त (आईपीएफ) शाखाअन्तर्गत ऋण तथा लगानी पोर्टफोलियोबाट उक्त प्रतिवेदन सार्वजनिक गरेको हो । नबिल बैंक सन् २०२१ का कार्बन एकाउन्टिङ फाइनान्सियल्स (सीएएफ)का हस्ताक्षरकर्तामध्ये एक हो । सोही प्रतिबद्धतापत्रको अंशको रूपमा उक्त प्रतिवेदन सार्वजनिक गरिएको हो ।

आईपीएफ पोर्टफोलियोले ऊर्जा, सिमेन्ट, वायुसेवा, दूरसञ्चार तथा अन्य व्यावसायिक क्षेत्रमा लगानी र ऋणको दायरा समावेश गर्छ । बैंकको दिगो बैंकिङ अभियानले आईपीएफ शाखाअन्तर्गत ऋण र लगानी पोर्टफोलियोबाट उत्सर्जन मापन गर्न लक्ष्य तय गरेको थियो ।

बैंकका अनुसार कार्बन उत्सर्जन मूल्यांकनअनुसार २०२२ मा कुल उत्सर्जन ८० हजार ६७१ टन कार्बनडाइअक्साइड बराबर भएको देखिएको थियो । जलविद्युत् र सौर्य ऊर्जामा भएको लगानीबाट २ हजार १३१ टन कार्बनडाइअक्साइड उत्सर्जन हुनबाट बचेको पाइएको छ ।

नबिलका प्रमुख कार्यकारी अधिकृत ज्ञानेन्द्रप्रसाद ढुंगानाले कार्बन फुटप्रिन्ट घटाउन र पोर्टफोलियो दिगो बनाउन यो महत्त्वपूर्ण रकम भएको र बैंकले यसमा अझै सक्रिय रूपमा काम गरिरहेको बताए । ‘यसका लागि सामूहिक पहल आवश्यक रहेको हामीले बुझेका छौं,’ उनले भने, ‘नेट शून्य कार्बन फुटप्रिन्टतर्फ हामीले प्राप्त गरेका प्रगतिमा नियमित जानकारी अद्यावधिक गर्न प्रतिबद्ध छौं ।’

प्रतिक्रिया [0]