एप्पलले सामसङको बजार खोस्दा साओमी बन्यो नेपालमा सर्वाधिक बजार हिस्सा ओगट्ने मोबाइल ब्राण्ड

अभियान संवाददाता

काठमाडौं । मध्यम मूल्य रेञ्जका मोबाइल विक्री गर्दै आएको चिनियाँ ब्राण्डको साओमी फोन नेपालमा सबैभन्दा धेरै बजार हिस्सा ओगट्ने फोनमा उक्लिएको छ । 

लामो समयदेखि नेपालको ठूलो बजार हिस्सा ओगट्दै आएको सामसङ फोनलाई साओमीले गत जुनदेखि पछि पारेको विश्वव्यापी मोबाइल मार्केट शेयरको तथ्यांक राख्ने स्टार्ट काउन्टरको तथ्यांकले देखाएको छ । तथ्यांक अनुसार साओमीको बजार हिस्सा उल्लेख्यरूपमा बढेको नभइ सामसङले बजार हिस्सा गुमाउँदा साओमी पहिलो बनेको हो । 

गत वर्ष सन् २०२२ को जुलाईमा नेपालको बजारको ३०.६१ प्रतिशत बजार हिस्सा ओगटेको सामसङले जुलाई २०२३ सम्ममा झन्डै ४ प्रतिशतले बजार गुमाउँदै २६ प्रतिशतमा खुम्चिएको छ । सोही अवधिमा साओमीले भने आफ्नो बजार हिस्सालाई यथास्थितिमा राखेको छ । हाल साओमीको बजार हिस्सा २६.६७ प्रतिशत छ । 

एप्पलले खोस्यो सामसङको बजार 

उक्त तथ्यांकअनुसार सामसङको बजार हिस्सा भने एप्पलले खोसेको छ । सामसङको बजार निरन्तर ओरालो लाग्दा एप्पलले भने नेपाली बजारमा आफ्नो हिस्सा दोब्बरले बढाएको छ । सन् २०२२ को अगष्टमा ७.२ प्रतिशत बजार पाएको एप्पलका मोबाइलले २०२३ को मेसम्म दोब्बरले बजार हिस्सा बढाएर १४.८ प्रतिशत पुर्‍याएको छ ।

कुनको बजार हिस्सा कति ? 

दुई ब्राण्ड साओमी र सामसङले मात्रै नेपाली बजारको आधाभन्दा बढी (झन्डै ५३ प्रतिशत) हिस्सा ओगटेका छन् । नेपालमा बढी विक्री भइरहेका ३ ब्राण्ड साओमी, सामसङ र एप्पलले ६५ प्रतिशत बजार ओगटेका छन्  ।

नेपालमा चिनियाँ ब्राण्ड साओमीको बजार हिस्सा सबैभन्दा बढी २६.६७ प्रतिशत छ भने दोस्रोमा कोरियाली ब्राण्ड सामसङ छ । सामसङले २६ प्रतिशत मात्रै बजार हिस्सा पाएको छ । त्यस्तै महँगो मूल्य रेञ्जका फोन विक्री गर्ने एप्पलले १२ प्रतिशत बजार पाउँदा ओप्पोले ७.८७ प्रतिशत बजार पाएको छ ।‌ ओप्पोले पनि पछिल्लो एक वर्षमा २ प्रतिशतले बजार गुमाएको छ । त्यस्तै रियलमी ६.८१ बजार पाउँदा भिभोले ६.७४ प्रतिशत बजार पाएको छ । 

त्यस्तै, नेपालमा विक्री हुँदै आएका हुवाई, टेक्नो, वनप्लस नोकिया लगायतका फोनको बजार हिस्सा भने १४ प्रतिशत मात्रै छ ।

विश्वभरमा एप्पलको बजार हिस्सा बढी 

विश्वव्यापी तथ्यांक हेर्ने हो भने सबैभन्दा बढी बजार हिस्सा एप्पलको छ । एप्पलले गत मेमा सबैभन्दा बढी ३१.४४ प्रतिशत बजार हिस्सा पाएको थियो । मेको तुलनामा जुलाईसम्ममा एप्पलको बजार घटेको छ । बजार घटे पनि बजार हिस्साका आधारमा एप्पल शीर्ष स्थानमै छ । एप्पलले जुलाईसम्ममा विश्व बजारमा २८.३६ प्रतिशत बजारसहित पहिलो स्थानमा रहँदा सामसङले २४.२३ प्रतिशत बजार पाउँदै दोस्रो स्थानमा छ । चिनियाँ ब्राण्ड साओमी ११ प्रतिशत बजार ओगट्दै तेस्रो स्थानमा छ । यी ३ कम्पनीले विश्वको मोबाइल बजारको ६४ प्रतिशत बजार पाउँदा एप्पल र सामसङले मात्रै झण्डै ५३ प्रतिशत बजार ओगटेका छन् ।

प्रतिक्रिया [0]