असनमा उदाय समुदायले मनाए ‘असं चालं’ [तस्वीरहरू]

सुनिल शर्मा

काठमाडौं । काठमाडौंको असनचोकमा बडादशैंको एघारौं दिन बुधवार विशेष पायाः(खड्ग) जात्रा अर्थात् असं चालं मनाइएको छ । असनका उदाय समुदायले एकादशीको दिनमा टीका लगाउने गर्दछन् । नेवार समुदायका तुलाधर, स्थापित, कंसाकार, शिलाकार, शिख्राकार थरकालाई उदाय भन्ने गरिन्छ ।

व्यापारीको रूपमा चिनिएका उदाय समुदायको कुनै बेलामा दशमीको दिनमा व्यापार व्यवसायमै व्यस्त हुँदा टीका थाप्न नै बिर्सेकाले भोलिपल्ट मात्रै टीका थापेको र त्यसबेलादेखि एकादशीको दिनमा टीका थाप्ने चलन शुरु भएको कथन छ ।

एकादशीको दिन असनमा निस्कने पायाः (खड्ग) जात्रा अन्य समुदायको भन्दा फरक हुन्छ । अन्य पायाःमा जेष्ठ नागरिक जात्राको मुख्य व्यक्ति अथवा थकालीको रूपमा खड्गसहित निस्किने गर्छन् भने असं पायाःमा सबैभन्दा कान्छो व्यक्तिले जात्राको नेतृत्व गर्छन् । यसैक्रममा यसपटक योगेन्द्र विर सिं तुलाधर र अनिशा तुलाधरका सन्तान साढे ५ महीनाका यनिश विर सिं तुलाधरलाइ थकालीको रूपमा सरिक गराइएको छ ।

पायाः निकाल्ने क्रममा असन चोकमा अवस्थित अन्नपूर्ण मन्दिरको पछाडि रहेको बकुननिको आगम घरबाट खड्गसहित पायाः निकालिने गरिन्छ । यसरी खड्गसहित निस्किएका व्यक्तिहरुले असनका परिक्रमा गरी फेरि आगम घरमै पुग्ने गरिन्छ । आगम घर पुगेर दानव वा असुरको प्रतीकको रूपमा कुभिन्डोलाई खड्गले मार हान्ने गरिन्छ । यससँगै पायाः जात्रा सम्पन्न हुने गर्दछ ।

प्रतिक्रिया [0]