पुसमा रत्ननगर महोत्सव, कृषि प्राथमिकतामा

अभियान संवाददाता

चितवन। चितवनको रत्ननगरमा आयोजना गरिने ‘रत्ननगर महोत्सव–२०८०’ को तयारी शुरू भएको छ । रत्ननगर उद्योग वाणिज्य संघले दुई–दुई वर्षमा गर्दै आएको महोत्सवको १२औं संस्करण पुस २६ देखि माघ ८ गतेसम्म सञ्चालन हुने बताइएको छ ।

महोत्सवको तयारी स्वरूप स्टल बुकिङका साथै आन्तरिक व्यवस्थापनको काम भइरहेको संघका अध्यक्ष तथा महोत्सव संयोजक शंकर गिरीले जानकारी दिए । महोत्सवमा बृहत् व्यावसायिक कृषि प्रदर्शनी तथा प्रतियोगिता गरिने आयोजकको भनाइ छ । महोत्सव अवधिभर कृषिसँग सम्बन्धित विभिन्न गोष्ठी, चितवनको आर्थिक विकास र उन्नयनका लागि विशेष आर्थिक क्षेत्रको स्थापना तथा चुनौती विषयक अन्तरक्रिया गरिने संयोजक गिरीले बताए ।

महोत्सवले समग्र जिल्ला तथा विशेषगरी पूर्वी चितवन र रत्ननगरको कृषि, पर्यटन, शिक्षा, स्वास्थ्य, विज्ञान, प्रविधि, कला, संस्कृति, व्यापार व्यवसाय र अन्य आर्थिक महत्त्वका क्षेत्रको आधुनिकीकरण, वैज्ञानिक उत्पादन प्रणालीसँग अभिमुखीकरण गराउने प्रमुख उद्देश्य लिएको बताइएको छ ।

पाँच सय स्टल रहने महोत्सवमा भारत, पाकिस्तान, बंगलादेश र चीनका प्रदर्शकसमेत रहने बताइएको छ । महोत्सवअन्तर्गत फुड फेस्टिवल समेत हुनेछ । 

प्रतिक्रिया [0]