थाई प्रहरी सङ्गठनलाई अर्थशास्त्रको ‘इग्नोबल’ पुरस्कार

Sep 28, 2015

र यो पनि

कुनै समय यस्तो थियो, जतिबेला अन्तरराष्ट्रिय समुदायले थाइल्याण्डको प्रहरी बलको आलोचना गर्दै यसको सुधारका लागि आह्वानसमेत गर्ने गरेको थियो । तर, अमेरिकी सङ्गठनले सृजनशील आर्थिक काम गरेको भन्दै त्यहाँको प्रहरी बललाई व्यङ्ग्यात्मक अन्तरराष्ट्रिय पुरस्कार दिएपछि भने सो धारणामा परिवर्तन आएको छ । बैङ्ककको महानगरीय प्रहरी प्रभागले त्यहाँका प्रहरी अधिकारीहरुले आफू लाई दिन खोजेको घूस लिन नमानेकोमा २५औं वार्षिक इग्नोबल पुरस्कार समारोहमा अर्थशास्त्रको व्यङ्ग्यात्मक पुरस्कार दिइएको इग्नोबेलका आयोजकहरुले यसको वेबसाइटमा बताएका छन् ।

सन् २०१४ को अक्टोबरको शुरुमा ट्राफिक पुलिसहरुमा मौलाएको घूसखोरी नियन्त्रण गर्नका लागि महानगरीय प्रहरी प्रभागले घूस लिन नमान्ने प्रहरीलाई १० हजार भाटसम्म नगद पुरस्कार दिने घोषणा गरेको थियो । तर, यो नीति २ हप्तासम्म मात्र चलेको थियो । त्यसपछि भने यसलाई रद्द गरिएको थियो । त्यतिबेला दुई जना प्रहरीले घूस लिन नमानेकोमा १० हजार भाट इनाम पाएका थिए । यो पुरस्कार वैज्ञानिक हास्य पत्रिका ‘एनल्स अफ इम्प्रोबेबल रिसर्च’ले आयोजना गर्ने गरेको छ ।

यसको उद्देश्य मानिसलाई हँसाउने र सोच्न बाध्य बनाउने खालको वैज्ञानिक उपलब्धिहरुको सम्मान गर्नु भएको बताइएको छ । म्यासाच्युसेट्सस्थित हार्वर्ड युनिभर्सिटीको अडिटोरियम हलमा आयोजित कार्यक्रममा सो पुरस्कार ग्रहण गर्नका लागि महानगरीय प्रहरी प्रभागले कुनै पनि प्रतिनिधि पठाएको थिएन । यो हालैका वर्षहरुमा थाइल्याण्डले पाएको दोस्रो इग्नोबेल पुरस्कार हो । यसअघि सन् २०१३ मा पनि थाइल्याण्डले यस्तै पुरस्कार पाएको थियो । एजेन्सी