भूपीलाई कामरेडको हेलिकोप्टर पैसा

Aug 26, 2016

तीतो मीठो

तपैं’ले थाहा पाउनु नै भयो होला, प्रधानमन्त्रीले भूकम्पपीडित (भूपी)लाई हेलिकोप्टर चार्टर गरेरै भए पनि पैसा बाँड्ने रे ! गजब छैन त यो आइडिया ? हाम्रा प्रमहरु कतिसम्म इन्नोभेटिभ हुन सक्छन् भन्ने कुरा यो घोषणाले पुनः प्रमाणित गरेको छ ।

अहिले संसारैभरि ‘हेलिकोप्टर पैसा’ भन्नेबारेमा एउटा हल्ला चलिरा’बेला पनि छ । यै मौकामा हाम्रा प्रम कामरेड प्रचण्डले पनि नेपालमा हेलिकोप्टरबाट पैसा बाँड्ने घोषणा गर्नु आफैंमा सुखद् कुरा त हो नै, त्यसमा पनि नेपालका भूपीहरुले कहिले सरकारले पैसा बाँड्ला र घर बनाऔंला भनेर २ वर्षदेखि कुरिरहेको स्थितिमा हेलिकोप्टरबाटै पैसा पाउने भएपछि अब के चाहियो र ? बरु हेलिकोप्टरचाहिँ धेरै खरीद गर्नु पर्लाजस्तो छ । किनकि, भएका एक/दुई हेलिकोप्टरले त भूकम्पपीडित १४ जिल्लाका झण्डै ४ सयभन्दा बढी गाविसका ४०औं लाख जनतालाई पैसा बाँडिसक्न कहाँ सकिएला र ? तर, सबै मन्त्री छुट्टाछुट्टै हेलिकोप्टर चढेर जान पाए भने त्यो काम पक्कै चाँडै सम्पन्न हुन्छ । अझ रकेटबाटै यस्तो काम गर्न पाए झन् चाँडो हुन्थ्यो ।

अनि सोच्नुस् त, नेपाली आकाशमा जताततै रकेट वा हेलिकोप्टरहरु उडिरहेको दृश्य कति रमाइलो होला ? नेपाली जनताले हाम्रा नेतालाई आकाशपथगामी हेलिकोप्टरबाट फुत्त झर्दै पैसा दिँदै, फेरि फुत्त हेलिकोप्टर चढ्दै गरेको देखेपछि उनीहरु आफूमाथि भगवान्कै निगाह भएको मान्दै धन्यधन्य हुनेछन् । देशकै ‘ग्रस नेशनल ह्याप्पिनेस’ ह्वात्तै बढेर भुटान त कता हो कता पछि पर्नेछ । संसार तिनछक पर्नेछ– हाम्रो सरकारको यो नवप्रवर्तन देखेर । अनि त अब आउने चुनावमा पूर्वकामरेड प्रम केपी ओलीको के पिताम चल्ला र ? कत्ति न लोकप्रिय भै’खाथे । अब प्रचण्डको अगाडि उनको लोकप्रियता सगरमाथा र थानकोटको डाँडो भनेजस्तो तुलनै गर्न नमिल्ने किसिमको हुनेछ । तर, हरेक मन्त्रीलाई हेलिकोप्टर दिन गाह्रो पो पर्छ कि ?

ओली सरकारका उपप्रम तथा गृहमन्त्री भीम रावलले सरकारी नपाएपछि सेनाको हेलिकोप्टर प्रयोग गरेको र त्यसबापत भाडा नबुझाएपछि निकै खैलाबैला भएको केही महीना मात्र भयो । त्यसैले हाम्रा पौराणिक हिरोहरु भगवान् विष्णुले गरूड, शिव भगवान्पुत्र कार्तिकेयले मयुर र लक्ष्मीले लाटोकोसेरो चढ्ने गरेजस्तै हाम्रा भगवान्सरह मन्त्रीज्यूलाई पनि त्यस्तै मयुर, गरूड, लाटोकोसेरो आदि केही खोजेर दिन पाए पैसोचाहिँ गाउँमा अलिक राम्रैसँग बाँडिहाल्थे कि ! तर, तिनलाई तालीम दिनचाहिँ अलि टाइम पो लाग्ला र त्यसमा पनि ढिलो होला कि ! त्यसो भए पनि अर्को उपाय छँदै छ नि । त्यो भनेको ड्रोन बनाएर वा चीनबाट मगाएर हरेक मन्त्रीलाई बाँडिदिने । त्यसरी पनि पैसा बाँड्ने काम छिटोछरितो हुन सक्छ र त्यो हेर्नेलाई हेलिकोप्टरजस्तै पनि लाग्नेछ ।

हुन त पैसाको सट्टा निर्माण सामग्रीहरु नै ट्रकहरुमा लादेर गाउँगाउँमा वितरण गर्दिन सकेचाहिँ भूपीहरुको घर पक्का बन्थ्यो । पैसाले घर बनाउने होइन । तर, त्यसो गर्दा प्रचण्ड सरकारले भगवान् अवतार धारण गरेर आकाशबाटै पैसा बाँडेको भन्ने जनताले थाहा नपाउने भएका कारण यो ट्रकवाला आइडिया किमार्थ लागू गर्नु हुँदैन । दोस्रोपल्ट प्रम बनेका कामरेड प्रधानमन्त्रीले अब रिबन काट्नेवाला छैन भनेर किन भनेचन् भनेको त बल्ल पो बुझियो । किनकि, हेलिकोप्टरबाट भूपी जनतालाई नगदनारायण नै बाँड्ने बृहत् योजना रहेछ । त्यसैमा ब्यस्त रहनुपर्ने भएर रिबनचाहिँ नकाट्ने भनेका रहेछन् । बाँकी कस्को तलब काट्ने, कस्को पद काट्ने, प¥यो भने कस्को गर्दन काट्नेजस्ता काम भने छोडेँ भनेका छैनन् नि !